Shillong, Nailar 13
Ka Kynhun Myntri ka Jylla ha ka Sngi Palei ka la mynjur ïa ka ‘Draft Resolution’ kaba pyrshah ïa ka jingtih ‘Uranium’ ha Meghalaya.
U Myntri Rangbah ka Jylla, u Conrad K. Sang-ma u la ong ba ïa kane ka ‘Resolution’ yn sa buh hakhmat ka Ïingdorbar Thawaiñ ha kane ka Dorbar Synrai ka ban sdang ha ka 24 tarik u Nailar.
Haba kren hadien ka jingïalang jong ka Kynhun Myntri ha ka Sngi Palei, u Conrad u la ong ba ka nongrim jong ka Sorkar pyrshah ïa ki kam ba ïadei bad u ‘Uranium’ ka long kaba skhem.
“Ka Kynhun Myntri ka la mynjur ïa ka ‘Draft Resolution’ pyrshah ïa ka jingtih ‘Uranium’ ha ka Jylla Meghalaya ïa kaba yn sa rah ha ka Dorbar Synrai ban wan jong u snem 2026, ka ban sdang ha ka 24 tarik mynta u bnai. Kumta, ïa kane ka rai la mynjur da ka Kynhun Myntri mynta ka sngi,” u la ong.
Halor ki jingdawa jong ki kynhun ba pyrshah ‘Uranium’ ban khang khyrdep ïa ka ophis jong ka Atomic Minerals Directorate ha Shillong, u Myntri Rangbah u la ong ba ka jingpynleit jingmut ba hakhmat eh mynta ka long ban ïoh ïa ka jingmynjur ïa kane ka ‘Resolution’.
“Kine baroh ki dei ka jingthmu jong ka Sorkar hynrei mynta hi kumba nga la ong, ka rai ka long kaba shai bha ba ngi la kyrpad sha ka Sorkar India ba kano-kano ka jait jingtih par ne kano-kano ka jait kam ha kaba ïadei bad u ‘Uranium’, ym dei ban leh ha ka Jylla Meghalaya,” la ong u Conrad.
U la bynrap ruh ba shisien ba ka Ïingdorbar ka la pdiang ïa ka rai, ka Jylla kan shim ïa baroh ki sienjam ba donkam ban pyntikna ba kum kane ka kam kan ym jia.
“Kumta shisien ba la rah ïa kane, kata ka paw shai ba baroh ki sienjam na ka liang jong ngi ha baroh ki lad ki lynti – ban pyntikna ba yn ym don kawei ruh na kiba kum kine ki jait kam ki ban jia; ngi pyrshang lut katba lah na ka liang jong ngi,” u la ong.
