Shillong, Nailar 13
U Myntri Rangbah ka Jylla, u Conrad K. Sangma ha ka Sngi Palei u la ong ba ka jingïalang bad ka tnad kam pohïing ka Sorkar Pdeng ka long kaba “manbha” haba ïadei bad ka Meghalaya Residents Safety and Security (Amendment) Bill (MRSSAB) bad shen yn sa nang pynlong shuh ïa ki jingïakren kiba kham bniah.
U Conrad u la ong ba ki ophisar ka Sorkar Jylla ki la pynlong bun tylli ki jingïalang bad u Secretary ka tnad kam pohïing ka Sorkar Pdeng halor ki kyndon ba bniah jong ka MRSSA.
“Ngi la don ka jingïalang kaba bniah bad u Secretary ka tnad kam pohïing. U Chief Secretary kumjuh u Commissioner & Secretary ka tnad kam pohïing bad Political ki la shong jingïalang bunsien ha ki kyrdan bapher-bapher bad u Secretary ka tnad kam pohïing ka Sorkar Pdeng halor baroh ki bynta ba bniah jong ka MRSSA,” u la ong.
U la kdew ba namarba ka ‘Bill’ ka ïadei bad ki kam kiba bniah, kumta donkam ïa ki jingïamir jingmut na ka por sha ka por ha ka kyrdan ki ophisar.
“Ngi la ïaid ha ka lynti kaba manbha bad ha ka lynti kaba dei. Kumba phi tip, kine ki dei ki mat kiba bniah bad kumta ka donkam shibun ka jingïamir jingmut bad shibun ka jingïakren ha ka kyrdan jong ki ophisar,” la ong u Conrad.
Katkum ka jingong u Myntri Rangbah, ka jingïakynduh kaba khatduh bad u Secretary ka tnad kam pohïing ka la pyni ba ka MHA ka kloi ban sngap ïa ki nongrim jong ka Jylla.
“Ngi lah ban sngewthuh ba ka tnad kam pohïing ka Sorkar Pdeng, ka Sorkar India, ka sngewskhem ïa kane. Ha ka jingïakren jong ngi, la mih shibun ki jingkdew kiba manbha,” u la ong.
U Conrad u la bynrap ba u Chief Secretary ka Jylla lem bad u Commissioner & Secretary-Political shen kin sa ïakynduh biang bad ki ophisar ka MHA, bad pynpaw ruh ka jingkyrmen ban ïaid shakhmat.
“Ngi don ka jingkyrmen kaba khraw ba ngin sa lah ban rah shakhmat ïa kane ha ka lynti kaba dei,” u la ong bad bynrap ba ma u lem bad u Symbud Myntri Rangbah ruh ki la ïakren la slem bad u Secretary ka tnad kam pohïing.
“Haduh ba kiei-kiei kim pat jia, kan ym long kaba dei ïa nga ban pynpaw ïa baroh ki bynta bad kiei kita ki mat. Hynrei nga lah ban ong tang kawei ba ki jingïakren ki long kiba manbha shibun,” la ong u Conrad.
