Shillong, Nailar 13
Ka Khasi Hills Autonomous District Council (KHADC) ka la rai ban leit kyrpad (Appeal) sha ka ïingbishar Meghalaya High Court halor ka rai kaba bthah ba ka District Council ka dei ban thung biang ïa u Pa’iem Ainam Manik Syiem kum u Syiem ba pura jong ka Hima Mylliem.
Ïa kane ka rai la pyntip da u Executive Member (EM) ba khmih ïa ka tnat Elaka u Bah Denzil R Chen, u ba la pyntip ba ha ka 14 tarik u Nailar, ka KHADC kan thoh ïa kane ka jingkyrpad sha Meghalaya High Court.
Haba kren sha ki nongthoh khubor u Bah Denzil u la ïathuh ba ka District Council ka dang ap ba un wan u CEM ban ïoh ïakren bniah ha kaba ïadei ka jingbthah jong ka ïingbishar ban thung Syiem ïa u Pa’iem Ainam Manik Syiem kum u Syiem ba pura ka Hima Mylliem.
U Bah Denzil u la pynshai ïa ka jingleit kyrpad ka Council sha ïingbishar, namar ba ka rai kaba la pynmih ka dei kaba mih na ka Single Bench jong ka Meghalaya High Court.
U la bynrap ba ha ka rai (Judgement) kaba la pynmih la bun kiei-kiei kiba ka District Council ka donkam ban leit kyrpad pyrshah, khamtam halor ka jingrai ba ka District Council ka la ïaid lait ïa ka Act 2007.
