Shillong, Nailar 13
Ka Khasi Hills Autono-mous District Council (KHADC) lyngba u Bah Denzil Raynard Chen Executive Member (EM Elaka), u la pynshai haba ïadei ka rai ba ka Council ka weng Syiem shipor ïa u Pa’iem Ainam Manik Syiem.
Haba kren sha ki nongthoh khubor ha ka sngi Palei u Bah Denzil u la ïathuh ba ka jingweng Syiem shipor ka Council ïa u Pa’iem Ainam ka long hadien ba ka KHADC ka la phah bun tylli ki jingthoh ba u dei ban pynshai ha khmat jong ka Council halor ki jingpynkheiñ ïa ki kyndon kiba kynthup ïa ka jingsiew kaba shi bynta na ka phra (1/8 share).
U Bah Denzil u la ïathuh ba u Pa’iem Ainam u la jubab ïa ka Show Cause Notice ba un siew noh ïa kine ki ram ha u bnai Lber 2026, hynrei kat haduh mynta ruh ïa kine khlem pat siew satia kumta ka Council ka hap ban shim ïa ka sienjam ban pynsangeh shipor ïa u ban pynlong ïa ka jingtohkit.
Shuh-shuh u EM u la pynshai ruh ba ka jingsiew kaba shi bynta na ka phra kam dei tang ka ‘Resolution’ kumba pynpaw u Pa’iem Ainam ha ki Media, hynrei ka dei kaba la pynskhem bha ha ka Sanad ba u la dep soi bad pdiang ruh, namar kata ka long kaba ym lah ban pdiang ha ka aiñ ba un pynkheiñ ïa ka lane ban mang tang 10% marwei.
Nalor kata u Bah Denzil u la ïathuh ruh katba ka jingtohkit (inquiry) ha ka Financial Irregularities jong ka Hima bad ka District Council ka dang ïaid, ka Financial Report jong u Snem 2025-26 ba la soi da u Acting Syiem Alban Fedrick Syiem, u Basan Nathaniel Thangkhiew bad u Myntri Kedresingh Kharpran ka la pynpaw ïa ki jingjah ka pisa kaba bun.
Katkum ka kaiphod jong u snem 2025-26 ba ka Council ka la ïoh ha ka 12 tarik u Nailar 2026 ka kdew ba ka Hima Mylliem ka ïoh lum pisa na ka Market Toll haduh T.1,13,08,520, katba ha ka Ledger la thoh tang T.97,42,560, kaba pyni shai ba ka don ka ka jingjah ka pisa T.15,65,960. Kumjuh ruh ha ka Land Revenue, ki Receipt ki pyni ïa ka jingmih pisa kaba kot T. 52,19,800, hynrei kaba la phah ha ki jingkheiñ ka long tang T. 26,09,923.
Nalor kine, la kdew ba ki jingpynlut jong ka Development kaba kot sha ka T. 34,65,037, kumjuh ka jingpynkhuid ïew kaba lut sha ka T.79,39,300, hynrei ïa kine ym don wat tang kawei ruh ka kot jingkheiñ ba pynshisha.
Shuh-shuh ka kaiphod ka la kdew ruh ba ka jingaiwai ïa ka ïew ha ki Myntri ha u snem 2025-26 ka jingïoh ka long T. 1,25,00,000, katba haba la khot da ka Public Tender ha u snem 2026-27 ka jingïoh ka la kiew sha ka T. 2,73,00,000, kaba pyni ïa ka jingïapher kaba poi sha ka T.1,48,00,000.
Ka kaiphod ka kdew ba ki jingpynlut ha kine ki kam kiba khlem don ki kot ki sla ban kyrshan ïa ki rukom pyndonkam pisa ki la kot sha ka T. 3,03,80,220. Ïa kane ka kaiphod la dep poi ha ki kti jong ki District Council Authority bad la dep ban pynhap sha u Under Secretary ban peit bniah bad tohkit ïa kane ka kam.
