Shillong, Naiwieng 24
Ka komiti tohkit jong 2 ngut ki dkhot ba la thung da ka tnad pule-puthi ka Sorkar Pdeng ban tohkit halor ki jingkynnoh bym biang pyrshah ïa u Vice-Chancellor (VC) ka North Eastern Hill University (NEHU), u Prof. Prabha Shankar Shukla ka la wan poi ha ka Sngi U Blei.
Ka kynhun ki 2 ngut ki dkhot jong ka komiti tohkit ba kynthup ïa u Chairman barim ka UGC, Prof. D.P. Singh (Chairman ka komiti) bad u VC barim ka Assam University, Silchar, Prof. Dilip Chandra Nath (Member) ki la wan poi ha ka janmiet Sngi U Blei, ong ki tyllong khubor ba tikna ka skulbah ha ka Sngi U Blei.
Nalor kitei 2 ngut, kin don ruh sa 2 ngut kiwei pat kiba la synran ïa ki ban ïarap ha ka ban lum thup ïa ki jingtip.
Ki tyllong khubor ki ïathuh ruh ba ka kynhun kan sa ïakynduh ïa ki samla pule ka skulbah, NEHUTA, NEHUNSA nalor kiwei-kiwei kiba don bynta bad ka skulbah ha ka step Lah Sngi U Blei ban sngap ïa ki jingpynsngew na ka liang jong ki haba ïadei bad ka kaiphod ba la aiti sha ka tnad pule-puthi ka Sorkar Pdeng.
Ha kajuh ka por, ki la ïathuh ba ka kynhun kan sa leit ban jurip bad khmih bniah ïa ka jinglong-jingman jong ka skulbah – kata naduh ki surok, ïingmala, bording, jaka sah bad kiwei-kiwei ha shuwa ban leit phai ha ka Sngi Ba-ar.
Ka tnad pule-puthi ka Sorkar Pdeng ha ka 14 tarik mynta u bnai ka la thung ïa ka ‘Inquiry Committee’ ban tohkit halor ki kynrum-kynram bad ki jingkynnoh ba ka don ka jingpynïaid bakla bad ka jingbym biang ka rukom pynïaid hapoh NEHU.
Ïa kane ka komiti la bynshet ban tohkit ïa kawei-pa-kawei ka jingujor bad ba ka dei ruh ban pynbiang bad aiti ïa ka kaiphod ba pura hapoh ka 15 sngi, kynthup ki jingai jingmut ban lah pynbeit ïa ki kynrum-kynram baroh.
Na ka liang ka tnad, ka la bthah ruh ïa ki bor pynïaid jong ka NEHU ba kin ai ïa ka jingïatreilang kaba pura sha kane ka komiti, kynthup ka jingpynbiang ïa baroh ki kot ki sla bad kino-kino ki jingïarap kiba donkam na ka bynta kane ka jingtohkit.
Hashuwa, ki samla pule ka NEHU ki la don hapdeng ka jingïakhih shah thngan hakhmat ophis treikam u VC (uba don hapdeng ka jingleit shuti) kaba la neh 16 sngi (naduh ka 5 tarik mynta u bnai) ban dawa ïa ka jinghiar shuki jong u (VC) kumjuh ban weng ïa u Registrar bad Deputy Registrar nalor kiwei kiba la shah kynnoh thung kam be-aiñ ha ka skulbah.
