Shillong, Nailar 18
Ka kam saiñ hima sima ha ka Jylla, ka ju kylla na ka por sha ka por, hashuwa ban don kano-kano ka ilekshon, ha kaba la lah ban sakhi ïa ka jingïarung ïa mih ki nongïalam bad ki nongmihkhmat na kawei ka party sha kawei pat.
Ïa kane la lah ban sakhi, lyngba ka jingpaw ka durkhih ha Instagram Account jong u President ka Voice of the People Party (VPP), u Bah Ardent Miller Basaiaw-moit, ha kaba la ïohi ïa lai ngut ki nongïalam ka Meghalaya Pradesh Con-gress Committee (MPCC) hapoh ka ophis treikam ka VPP, kaba don ha Laitkor, Kynton-U-Mon.
Ha ka jingthoh ba la paw, u Bah Ardent u la thoh halor katei ka durkhih, ba ki lai ngut kiba la kynduh ïa u ki kynthup ïa u Bah Rocky A. Marwein, u President barim ka Ri Bhoi District Congress Committee bad ka Umsning Block Congress Committee, nangta u Bah George C. Sun, Secretary barim ka East Khasi Hills District Congress Committee bad President ka Mawphlang Block Congress Committee, bad u Bah Nathaniel O. Rymmai, President barim ka Sohiong Block Congress Committee.
U Bah Ardent u la kdew ruh ba ka jingïalang ka long kaba seisoh bha, ha kaba u la ïoh ban batai kham bniah ïa ka jingmut bad ka jingthmu ka party.
U la pynpaw ruh ka jingkmen ban tip na kitei ki lai ngut, ba kiba bun ki samla kiba khuslai ïa ka lawei jong ka Jylla, ki la sdang ban phai sha ka VPP kum kawei na ki lad bad ki jingkyrmen thymmai na bynta ka lawei jong ka Jylla.
Lah ban kdew ba hashuwa kane ka jingïakynduh, la ïohi ba u Bah Nathaniel, uba dei u khun jong u Bah HDR, u la leit ban ïa shimbynta ruh ha ka sngi ïakhih ka VPP ban ïaid paidbah bad ker tawiar ïa ka Secretariat, ban pynsngew ïa ka Sorkar halor kiba bun ki mat jingdawa.
