Shillong, Nailar 18
U Myntri ka Koit ka Khiah ka Jylla, u Bah Wailadmiki Shylla un sa ïakynduh ïa ki bor pynïaid ka NEIGRIHMS ha ka 19 tarik u Nailar ban ïakren halor ki jingeh jong ki paidbah bad ban ïakren ruh halor ka kyrdan Institute of National Importance (INI).
U Myntri u la ong ba kane ka jingïalang ka thmu ban pynbha bad tei ïa ka jingshaniah ha ki nongshong shnong ha kane ka shlem ai jingsumar ba bun jait, kaba u sngew ba ym ju da kham pyndonkam bha da ki briew jong ka Jylla.
“Nga la thmu ïa kane la slem bah. Ka NEIGRIHMS ka dei ka shlem pule kaba heh, kaba don ruh ïa ka jaka sumar ha kiba bun rukom, hynrei ym shym la shim kabu ïa ka da ki trai shnong,” la ong u Bah Wailad ha ki nongthoh khubor ha ka Sngi Ba-ar.
“Nga kwah ban ïakynduh ïa ki bor pynïaid ban kylli kaei kaba ki thmu ban leh khnang ban ïoh ïa ka jingkyrmen skhem bad jingshaniah jong ki paidbah ban leit phah sumar ha NEIGRIHMS,” u la bynrap.
U Bah Wailad u la ong ba ka kyrdan INI jong kane ka jaka pule ruh kan long ka mat ba kongsan ban ïakren.
“Ki don ruh kiwei pat ki mat, kum kaei kaba ki la leh ha kaba ïadei bad ka kyrdan INI jong ka NEIGRIHMS namarba kane ruh ka long kaba kongsan bha,” u la ong.
Ïa u Myntri yn synran lang da ki ophisar na ka tnad ka Koit ka Khiah.
