Khliehriat, Nailar 18
Ki trok jong ka kompeni Shree Cement kiba thmu ban pynpoi tiar ha ka thaiñ Elaka Nongkhlieh, East Jaiñ-tia Hills District, ha ka 18 tarik Nailar kila ngam bad sahkut da ki bun kynta ha ka jaka ba la tih ïa ka surok PWD ha ka thaiñ Tongseng-Nongkhlieh.
Lah ban kdew ba ïa katei ka surok PWD la tih da ki briew kiba ym lah ban tip ha kito ki por hashwa ban pynlong ïa ka ‘public hearing’ ha ka 31 tarik Naitung 2026.
Ki katto katne ki nongshong ka thaiñ Elaka Nongkhlieh ki kynnoh ba ïa kane ka surok la tih da ki nongkyrshan jong ka Shree Cement ban khang lad ïa ki nongpyrshah ban ïashim bynta ha ka ‘public hearing’ ka Shree Cement ha Lumsyrman.
Kane ka jingjulor ka surok ha katei ka bynta ka la buh jingeh ym tang ïa ki kali kit tiar jong ka kompeni Shree Cement hynrei ka la buh jingeh ruh ïa ki paidbah ba leit ba wan kiba dei ïaid lynti lyngba na Tongseng -Nongkhlieh kum ki briew kiba shong ba sah ha ka thaiñ Elaka Nongkhlieh bad kito kiba na ka thaiñ Saipung kiba thmu ban leit donkam sha ki jaka ai jingsumar bad sha ki jaka treikam.
