Shillong, Nailar 18
Ki runar bym lah ban tip ki dei kiei, ki la thang ïa ar tylli ki shaka (tyre) hapdeng surok kaba don hajan jong u Mot UKiang Nangbah, kaba ïajan bad ka Shillong Civil Hospital.
Kane ka jingjia thang tyre, ka la jia ha ka miet jong ka sngi Ba-ar, la ong ki pulit.
Halor kane, u SP (City) Bah Dangsan Khyriem u la ong ba kane ka jingjia thang tyre ka la jia ha ka por kumba 9 baje mynmiet.
“Ki la don katto katne ki runar kiba la wan bad thang ïa ki ar tylli ki tyre hapdeng jong ka surok, kata hakhmat jong u Mot U Kiang Nangbah,” la ong u SP City.
Mar ïa ïoh jingtip halor kane, ki pulit ki la leit mar mar sha katei ka jaka ban pynlip noh ïa ka ding. Ym shym la don kano-kano ka jingmynsaw ne jingjulor jong ki jingdon jingem.
Watla ka la don ka jingthang tyre, hynrei haba na ka liang u nongthoh khubor u la hiar sha katei ka jaka hadien ba la ïoh jingtip, la lap ba ym shym la don dak eiei shuh, imat na ka liang ki bor ba dei khmih, ym tang ba ki la pynlip noh ïa ka ding hynrei ki la pynkhuid ruh wut wut.
U SP City u la ong ba halor kane ka jingjia, la pynïaid shakhmat ïa ka jingtohkit ban lap dien bad kem ïa ki briew kiba donkti ha kane ka kam.
