Shillong, Nailar 18
Ki pulit jong ka South West Garo Hills District ha ka sngi Ba-ar ki la ïoh ban kurup noh ïa u ganja ba khia kumba 1.439 kilo bad ban rah noh ïa uwei u briew, ha ka por ba la pynlong ïa ka jingtalasi kali ha ka lad Jhunjhuni.
Katkum ka jingïathuh jong ki pulit, ka kynhun ki pulit na Kalaichar Police Patrol Post ka la ïoh ban bat noh ïa uwei u briew ha ka por ba dang pynlong ka jingtalasi bad ha kaba la talasi ïa u.
Une u briew ba la shah rah, u dei uba la tip kyrteng kum u Abdul Zaher, 53 snem, u nongshong shnong jong ka Jhagarchar, Kakripara, Mankachar. Ki pulit ki la ong ba ïa une u ganja la ïoh kurup na ka met jong u.
Ïa une u briew la rah noh ha along ki pulit bad ki kam ba ïadei bad ka aiñ la pynïaid shakhmat hapoh ki kyndon jong ka Narcotic Drugs and Psychotropic Substances (NDPS) Act.
Na ka liang jong ki pulit ka South West Garo Hills District ki la ban jur ban trei shitom ban khanglad ïa ka jingkhaïi drok bad kiwei ki jingdih ba beaiñ ha ka thaiñ.
Ha ka kyrwoh khubor, u Superintendent of Police Vikash Varma u la kyrpad ruh ïa ki paidbah ba kin long kiba peitngor bad ban kloi ban ai ïa ki jingtip.
“Ngi kyrpad ïa ki paidbah ba kin long kiba peitngor bad ban pynbiang ïa ki jingai jingtip sha ki thanad kiba hajan haba lap ne tip halor kino kino ki kam beaiñ,” la ong u Varma.
