Shillong, Naiwieng 25
U MP ka Tura uba dei ruh u nongïalam ka Congress u Saleng A Sangma u khlem lah ban pynurlong kumba la khmih lynti kiba bun ki paidbah namar u kyrtong ka Congress u khlem lah ban jop na Gambegre konstitwensi ha kane ka ilekshon MLA shiteng samoi kaba dang shu dep.
Ka jingbym lah ka Congress ban bat biang ïa ka Gambegre kaba dei ka konstitwensi kaba la ju mihkhmat da u Saleng ka long ka jingdiaw ïa ka Congress ha jylla baroh kawei namar lada ka jop ha Gambegre ka khubor kan long ka jingkyrmen ïa ki paidbah ym tang ha Rilum Garo hynrei baroh kawei ka Jylla.
Ki don ki daw kiba pynlong ïa ka Congress ban ym jop kum ka jingong ba u kyrtong u kham tlot. Wat lada u kyrtong u kham tlot, hynrei u dang ïoh vote la jan 8,000 vote kaba pyni ba u Saleng u dang lah ban bat ïa ki nongkyrshan wat lada u kyrtong u wan balai bad ïoh 7,695 vote.
Ka National People’s Party (NPP) kaba la duh mynsiem hadien ka jingjop ka Congress ha ka ilekshon Lok Sabha na Tura Parliamentary konstitwensi ka la ïoh mynsiem biang da ka jingjop jong ka Dr Mehtab Chandee A Sangma na Gambegre ha kane ka ilekshon shiteng samoi.
Kiba bun ki la khmih kynti ba ka Congress jop na Gambegre khamtam namar ka dei ka konstitwensi kaba la mihkhmat da u Saleng A Sangma la bun phew snem.
Kiba bun ki paidbah ki la pynpaw ba lada u Saleng un ïakhun biang na Gambegre ha ka ilekshon MLA ha u snem 2028, ym don jingeh ïa u ban jop wat lada ka NPP ka la ïoh ban bat ïa ka Gambegre ha kane ka ilekshon shiteng samoi.
“Hapdeng ka jingtlot u kyrtong ka Congress ha kane ka ilekshon shiteng samoi, hynrei u Saleng u dang lah ban pynkohnguh ïa ki paidbah ban ai jingkyrshan ïa u kyrtong jong ka seng,” la pynpaw ki nongpeit pyrman ïa ka saiñ pyrthei.
Katkum ka tyllong khubor la ong ba u Saleng u lah ban wanphai biang sha ka saiñ pyrthei ha Jylla bad pyllait noh ïa ka jinglong MP lada u shahjied kum u MLA.
U Saleng u long u MLA naduh u snem 2008 khlem pat shah rem. Dei ha u snem 2013 ba u la kynriah ban ïakhun na Gambegre konstitwensi bad u la jop lynter haduh u snem 2023.
