Shillong, Naiwieng 26
Ka Mylliem SC bad ka Lawsohtun SC ki la ïoh jingjop ha ka lympung ïalehkai First Division Football League 2024 ba la pynïaid da ka Shillong Sports Association ha ka Sngi Ba-ar ha SSA Stadium kaba ha First Ground, Polo.
Ha kane ka jingïakhun ka Lawsohtun ka la pynliem noh ïa ka Mawkhar SC da 3-0 kol bad ka Mylliem ka la jop da 3-0 kol ïa ka Pohkseh SC.
Ka Mylliem lyngba kane ka jingjop ka la don ha ka kyrdan ba-ar ryngkat ban kiew kyrdan bad ka Malki SC (ba nyngkong) sha ka Shillong Premier League jong u snem ban wan. Wat la ka Mawtawar SC ka lah ban pynryngkat poiñ lada kan jop ïa ka jingïakhun khatduh pyrshah ïa ka Sohryngkham ha ka 28 tarik, hynrei ka Mylliem ka la tam ïa ka Mawtawar hadien ba ka la jop ha ka jingïakynduh ha ka 22 tarik mynta u bnai.
Te kumta ka Pohkseh ka la ïai sah ha ka kyrdan basan bad 11 point na ki khyndai sien ïakhun.
Ïa ki kol ka Mylliem la thep da u Bryan Kharbud -nah ha ka minit kaba 45+2 & 80 bad u Forward Pdeng (90+4).
Haba phai sha kawei pat ka jingïakhun kaba la long kham hashwa, ïa ki kol na ka bynta ka Lawsohtun la thep da u Morningstar Khongkiang ha ka minit kaba 19 bad u Kitboklang Pale ha ka minit ba 32 & 39.
Ka Lawsohtun, Maw-khar bad ka Sohryngkham SC ki ïaryngkat mar 9 poiñ, wat la ka Sohryngkham ka dang sah sa kawei ka jingïakhun kaba khatduh. Kumba ka paw ka Lawsohtun ka la lah ban tam ïa kitei ar tylli ki kynhun lyngba ka jinglah ban thep kol kham bun ïa ka Mawkhar bad ïakhaid pyrshah ïa ka Sohryngkham ha ka 11 tarik mynta u bnai. Katba ka Mawkhar ka la lah ban pynliem ïa ka Sohryngkham ha ka 22 tarik, bad kumta ka la don hadien ka Lawsohtun.
Ki jingïalehkai khatduh jong ka lympung First Division kin long ha ka Sngi Palei ha kaba ka Sohryngkham kan ïakynduh pyrshah ïa ka Mawtawar ha ka por 11:30 mynstep bad ka Nongkseh SC ïa ka Nongrah SC ha ka por 2:30 nohphai sngi. Ka Malki SC ka la lah ban pynthikna kum ka lahduh hadien ka jingjop ha ka Lah Sngi U Blei pyrshah ïa ka Nongkseh da 2-1 kol.
Ki jingïalehkai jong ka Shillong Premier League ha ka Sngi Balang kin long hapdeng ka Nangkiew Irat SC pyrshah ïa ka Shillong Lajong FC ha ka por 11:30 mynstep, kumjuh ka Laitkor SC ïa ka Rangdajied United FC ha ka por 2:30 nohphai sngi bad ka Mawlai SC ïa ka Nongrim Hills SC ha ka por 5:30 janmiet.
