Shillong, Naitung 17
Ka Hynñiewtrep Achik National Movement (HANM), Eastern West Khasi Hills District ha ryngkat ka jingïatreilang bad ka Hima Nongkhlaw, ha ka step jong ka sngi Thohdieng ka la pynlong ïa ka jingïamareh marathon na ka bynta ki samla kynthei bad shynrang jong ka dong ka thain Eastern West Khasi Hills.
Ka jingpynlong ïa kane ka marathon ka long ban kynmaw burom ïa ka lyngkhuh sngi ïap ba 191 jong u Tirot Sing Syiem bad ruh ïa ka jingpynkut ïa ka jingrakhe dap 500 snem jong ka Hima Nongkhlaw.
Ha kane ka jingïamareh la sdang na Mot Tirot Mission haduh madan Nongrah lyngba ka surok bah Mairang-Nongkhlaw National Highway, ha kaba la sakhi ïa ka jingïashim bynta shitrhem naduh ki samla kynthei bad shynrang. La ïadonlang ha kane ka sngi kynthup ïa u Sports Secretary ka HANM sengkmie u Bah Banskhem Wardkhar, u President ka HANM EWKHD u Bah Artis Ryntathiang, u Secretary Shnong Nongkhlaw lem bad kiwei ki kynrem ki lyndan.
Ïa ka nam nongjop ha ka liang ki shynrang la rah da u Wankyrmen L.Mawphlang, ba ar u Jinesfulson Hujon bad balai u Sharailang Ryntathiang, katba ha ka liang ki kynthei la jop da ka Naibanjanai Sun, ba-ar ka Makabanphyrnai Sun bad balai ka Kandamanbha Syiemlieh.
