Shillong, Naitung 17
U rephri na ka bynta ka phainal jong ka FIFA World Cup 2026 la rai ha kaba u Slavko Vincic na Slovenia un shim ïa ka jingkitkhlieh ban pynïaid ïa kane ka jingïakhun.
Ki ban ïarap ïa u ha kane ka jingïakhun jong ka Argentina pyrshah ïa ka Spain ha New York ha ka step jong ka lah sngi U Blei kin long kum u Tomaz Klancnik (assistant referee 1), Andraz Kovacic (assistant referee 2), Adham Makhadmeh (fourth official), bad u Mohammad Alkalaf (reserve assistant referee).
“Ka jingïalehkai da ki rong ksiar ka dei kaei kaei kaba itynnad. Nga ngeit skhem ba phi ïahap jingmut bad nga. Ka long kaba itynnad shisha. Kumjuh ruh, ka long kaba itynnad ba u nongpynïaid un dei u Slavko Vincic,” la ong utei u khlieh jong ki rephri ha ka FIFA, u Pierluigi Collina ha kaba pynpaw ha ka rynsan social media, kumba la pynthikna ïa ka jingthung jong u Vincic.
Hapdeng ka jingïakren ha kaba ïadei bad ka FIFA ba kan ‘kyrshan’ ïa ka Argentina ha kane ka World Cup, ka la don ka jingpynleit jingmut halor ki rephri bad ka VAR (Video Assistant Referee) ha kane ka lympung. U Vincic u la jaw ummat katba dangpynbna ïa ka jingthung jong u. Ïa ka video jong kane ka sngi la pyllait ruh da ka FIFA ha rynsan social media.
Haba phai khyndiat shaphang u Vincic uba la 46 snem ka rta u la lah ban kyntiew ïa lade ha ka ban pynïaid ïa ki lympung ïalehkai. Hadien ba u la ïoh ban pynïaid ïa ki ar tylli ki jingïalehkai World Cup ha Qatar ha u snem 2022, ka jingïakhun final ka Argentina bad ka Spain un ïoh ban pynïaid ha ka sien kaba hynriew ha ka World Cup.
U Vincic um dei shuh uba dangthymmai ha ka kam pynïaid ïa ki jingïalehkai phutbol. Napdeng ki jingïalehkai ba kongsan ha ka jingim jongu, u Vincic u la long u nongpynïaid ïa ka jingïalehkai final jong ka UEFA Champions League ha u snem 2024 hapdeng ka Real Madrid bad ka Borussia Dortmund ha Wembley Stadium.
U la pynïaid ruh ïa ka jingïalehkai phainal jong ka UEFA Europa League 2022 hapdeng ka Eintracht Frankfurt bad ka Rangers.
