
Shillong, Nohprah 11
Ka Executive Committee jong ka Khasi Hills Autonomous District Council (KHADC) ka la rai ban wanrah noh da ki kyndon (Rules) ban tehlakam ïa ki nongshong die madan ha ki jaka kiba hap hapoh ka KHADC.
U Chief Executive Member (CEM), Bah Pynïaid Sing Syiem u la ong ba da ka jingwanrah ïa kine ki kyndon, baroh ki nongdie madan kiba dei ki Khasi ki dei ban pynrung kyrteng ïalade bad ka Council, katba ki bym dei Khasi ki dei ban ïoh ïa ka laisen khaïi na ka Council.
“Ki bym dei Khasi ne ki bar jylla kin hap ban shim da ka Trading License bad kin ym lah shuh ban shu shong die jingdie pathar ha ki lynti, ki rud surok bad ha kino-kino ki jaka ïew, jaka paidbah khamtam ki bym don ïa ka License”, u la ong.
U la ong ba kine ki kyndon ki long kiba donkam bha ban pynkhlaiñ shuh-shuh ïa ka Market Act kaba ka KHADC ka la don, ha kaba u la pyntip ruh ba ïa kine ki kyndon yn sa wanrah ha kane ka Dorbar Tlang ban wan.
U CEM u la ïathuh ba ka KHADC ka la ïoh ruh bun bah ki jingujor ha kylleng ki jaka ba ki nongshong die madan ki dei kiba wan na kiwei pat ki jaka.
Haba pynpaw ka jingsngewkhia ïa ka jingkharoi ki nongdie madan ha bun ki jaka ha sor Shillong, u Bah Pynïaid u la ong ba kine ki kyndon kin ïarap ban ithuh ïa ki briew, namar kumba ka long mynta kiba shong die madan dei ki briew kiba ym lah shuh ban ithuh bad ym tip ki sah haei ruh.
“Ka jingbun bah ki khyllah jait kiba wan die madan bad kiba ym tip ki sah haei, ka buh jingma shisha ïa ka Sor Shillong, lada ngim wanrah da ki aiñ kiba khlaiñ ban tehlakam ïa kum kine… kaei ka ban jia hadien ngim lah ban tip”, la ong u CEM.
Nalor kane, u la ong ba ha kiba bun ki jaka ha sor Shillong la shong die madan da ki briew kiba ym lah shuh ban ithuh kiba wan naei bad kiba sah haei, namar ym tip la ki don ne em ïa ki kot ki sla ban pynshisha, da kaba pynpaw ruh ba ki lah ban don kiba wan rung na Bangladesh hadien ba la mih ka jingkulmar ha katei ka ri ha ki khyndiat bnai ba la dep.
Haba kylli, u CEM u la pynshai ba ka jingbthah ïa ki Khasi ruh ban pynrung kyrteng hapoh ka KHADC ka dei namar ka jinglap jong ka Council ba bun ki dukan ki dei kiba shong die jingdie da ki bym dei Khasi hynrei kam trai pat da ki Khasi.
U CEM u la ong ba ka jingpyntreikam ïa katei ka rule kan long katkum ka Aiñ Benami jong ka Jylla bad ka Council kan pynshitom katkum ka aiñ ïa ki Khasi kiba ai jaka riehtngen ïa ki briew nabar.
“Ka jingpyrkhing kam dei eh ïa ki briew ki jong ngi, hynrei kan long ïa ki briew kiba nabar kiba shu wan kamai khlem da bud ïa ki kyndon jong ka aiñ Sorkar ne District Council”, la ong u Bah Pynïaid.
U la ong ruh ba ka jingai laisen khaïi kan dei da kaba bud ryntih ïa ka Trading by Non Tribal Regulation, 1954 ba kiba aplai kin hap ban ïoh ïa ka jingithuh na ka Dorbar Shnong, trai dukan ne trai jaka bad yn sa ai ïa ka laisen khaïi bad ki bym biang ïa ki kot ki sla kin ym ïoh satia ïa ka laisen.
U CEM u la pyntip ruh ba ka Council ka la dep ïakynduh bad u Myntri Kam Pynroi Sor, Bah Sniawbhalang Dhar bad ïa u Myntri Kam Jngohkai, Bah Paul Lyngdoh ban pynpaw ïa ka jingsngewkhia bad ban kyntu ba ym dei ban ai shong dukan madan pathar ïa ki briew nabar khlem da bishar bha shwa. Ha kajuh ka por u la ïathuh ba ka Council ka la ïakren ruh ba ym dei ban ai jaka ïa ki bar jylla khlem da bishar ha ki jaka ba ithuh da ka Sorkar.
“Bun ki briew jong ngi kiba wad kam wad jam ban shong madan ruh kim ïoh, katba ïa kiba nabar pat ki ïoh syndon ha ka jaka Sorkar. Kane kaba ngi sngewkhia bha bad ka Sorkar ruh ka hap ban shim ïa kane ka jingai jingmut ka jong ngi”, la ong u CEM.