Nongpoh, Nohprah 22
U District Magistrate jong ka Ri Bhoi District katkum ba la pynkup bor da ka kyndon (Section) 163 jong ka Bharatiya Nagarik Suraksha Sanhita (BNSS), 2023, u la pynmih ïa ka hukum ban khang ïa kino-kino ki ‘riew shimet, ki longïing, ki karkhana, ki ïing basa shimet, ki jaka ban thep umphniang kali bad kiwei kiwei de ba kim dei satia ban tih khyndew khlem ka jingïoh jingbit na ki bor ba dei khmih ba ki jaka kiba la mih bun ki jingujor, kata kumba 1 kilometer na ka surok bah National Highway naduh na Khanapara ter ter shaduh sha Byrnihat.
Ka jingpynmih ïa kane ka hukum ka dei halor ka nongrim jong ka jingdon ka jingtih khyndew pathar ha shilynter jong kane ka surok bah bad ruh ki surok PWD ha kane ka thaiñ, kaba lah ban wanrah ïa ka jingpynjulor kaba shyrkhei ïa ka mariang sawdong sawkun bad ruh kaba lah ban wanrah ïa ka jingtwa bad jingtuid jong ka khyndew.
U District Magistrate ka Ri Bhoi u la pyntip ruh ba lada lap ïa kino-kino kiba leh pyrshah bad pynkheiñ ïa kane ka hukum, kin ngat ha ka jingpynshitom katkum ka kyndon 233 jong ka aiñ Bharatiya Nyaya Sanhita, 2023 bad kane ka hukum kan treikam mardor tad haduh ba la pynbna da kumwei pat.
