Shillong, Nohprah 22
U Myntri tnad kam pohïing bad Cooperation ka Sorkar Pdeng, Amit Shah ha ka Sngi Saitjaiñ u la pynïaid ïa ka jingïalang ba 12 jong ka North Eastern Space Applications Centre (NESAC) Society ha Agartala, Tripura.
U Myntri Sorkar Pdeng ka tnad Development of North Eastern Region (DoNER), Jyotiraditya M. Scindia, Myntri Rangbah ka Tripura, u Dr. Manik Saha, Myntri Rangbah ka Assam, u Himanta Biswa Sarma, Myntri Rangbah ka Manipur, u N. Biren Singh, Myntri Rangbah ka Arunachal Pradesh, u Pema Khandu, Myntri Rangbah ka Sikkim, u Prem Singh Tamang bad kiwei-kiwei ki la ïadonlang ha kane ka jingïalang.
Ha ka jingai jingkren, u Amit Shah u la ong ba hapoh ka jingïalam jong Myntri Rangbahduh ka ri, u Narendra Modi, ki kam haw-haw jong ka India ki la jam shaphrang ha kine ki 10 snem ba la dep.
U la ong ba hadien 25 snem ka jingsdang ïa ka NESAC Society, ki jingseisoh jong ki kam ka Society ki la sdang ban paw mynta. U la ong ruh ba ka NESAC Society ka dei ban pynïar shuh-shuh ïa ki kam jong ka ha kine ki Jylla bad na ka bynta kane, dei ban shim ïa ki sienjam da ki Sorkar Jylla.
Ha kajuh ka por, u Myntri u la kyntu ïa ka NESAC Society ba kan ïalam 100 ngut ki samla pule (ha ki kam ‘Science’) na man ki Jylla ka thaiñ Shatei Lam Mihngi ba kin leit jngoh ïa ka HQ jong ka Indian Space Research Organisation (ISRO) khnang ba kin don ka jingsngewtynnad bad ki kam kiba ïadei bad ka haw-haw bad ka teknoloji. U la kyntu ïa ka tnad DoNER ba kan noh synñiang 60% na ka bynta kane ka kam.
U Shah u la kyntu ruh ïa ki Sorkar Jylla jong ka thaiñ Shatei Lam Mihngi ba kin sdang ïa ki jingpule bathymmai kiba ïadei bad ka teknoloji haw-haw ha ki kolej ‘Engineering’.
U la ong ba la shna ïa 20 tylli ki lad ka leit ka wan lyngba ki jaka shong um da ka jingïarap ka NESAC bad ka Society ka dei ban peit ïa ki lad ban shna shuh-shuh ïa kum kine ki lad ka leit ka wan.
U la ong ba ka long kaba donkam ban pynïar ïa ka jingithuh ïa ki jaka ba don ki mar poh khyndew, ka umphniang, bad ki par dewïong ha ki Jylla ka thaiñ – kane kan ïarap ïa ka ïoh ka kot jong ki Jylla lyngba ka jingkamai na ka jingtih ïa kine ki mar.
U Myntri u la ban jur ruh halor ka jingdonkam ban tip ïa ka jinglong-jingman jong ka jingdon ki briew ha ki jaka khappud hapdeng ka India bad Myanmar, khamtam ha Nagaland, Mizoram bad Manipur ban ïarap ïa ka kam ban ker ïa ki jaka khappud bad ka jingrung be-aiñ jong ki briew. U la ong ba na ka bynta kane, dei ban don ka khanasamari kaba bniah ha ki jaka khappud.
U Shah u la ong ruh ba ka jingkyntiew ïa ki jaka tap khlaw ka dei ban dei ka kam ba peit bniah da ka NESAC Society da kaba pyndonkam ïa ka ‘Science’ kaba ïadei bad ka haw-haw.
U la ong ba na ka bynta kane, dei ban shim ïa ki sienjam da kaba ïanujor bad ki ‘map’ barim lem bad ki bathymmai bad haba don ka lad, dei ban shim ïa ki sienjam ban thung ïa ki dieng ha ka jingïatreilang bad ki Sorkar Jylla. Kumjuh u Myntri u la kyntu ïa ka Society ba kan buh ïa ki ‘map’ shaphang ki jingshlei um ha ka Thaiñ Shatei Lam Mihngi.
Shuh shuh u Myntri u la ïaroh ïa ki sienjam jong ka NESAC Society na ka bynta ka jingpyndonkam ïa ka teknoloji haw-haw na ka bynta ka jingpynïaid ïa ki kam bad u la ban jur halor ka jingpyndonkam bha ïa kane ha ka jingkyntiew ïa ka jaka kaba bun ki jingeh kum ka thaiñ Shatei Lam Mihngi ha ki por ban wan. U Shah u la ong ba ka NESAC Society ka dei ban peit bniah ïa ki lad kamai pisa jong ka.
