Shillong, Jymmang 06
Ka Congress haduh mynta kam pat lah ban pynbna ïa u kyrtong na ka bynta ka ilekshon MP shiteng samoi na Shillong, bad na ka liang jong u Secretary ka Meghalaya Pradesh Congress Committee Bah Manuel Badwar ruh ha ka sngi Balang u la pyntip ba un nym ïakhun ïa kane ka ilekshon.
“Nga sngew ba nga la pynshai kdar ha kaba ïadei bad ka Congress, haduh mynta ngim pat shim rai, bad ngim pat shong jingïalang ruh satia. Hynrei, ïa ka jingpan jingmynjur ngi la dep ban phah sha Delhi, bad ka AICC kan sa shim ïa ka rai kaba khatduh,” la ong u Bah Badwar haba kylli halor ka rai jong ka Congress.
U la ong ba ka seng kam da don bun kiba kwah ban ïakhun ïa katei ka shuki.
“Kumta, ngim da don bun kiba kwah ïa kane, ngi don tang katto katne ki nongïalam bad ba ka la ïaid ruh ka jingsawa ba u Bah Manuel Badwar ba un dei ruh uwei na ki kyrtong ba kwah ban ïakhun. Nga kwah ban kren da kaba shai ba ngam don satia ka jingthmu ban ïakhun ïa ka ilekshon MP,” u la ong. Haba batai kham bniah halor kane ka rai, u Bah Badwar u la kdew halor ka jingduna ha ka jingshemphang bad ka jinglyngkot palat ka samoi jong kane ka ilekshon shiteng samoi.
“Kaba nyngkong, ka long ka jingshisha ba nga dang long thymmai bha, kawei pat ka jingshisha ka long ba ka sah sa tang kumba ar snem bad la sngewthuh ba kan long shisha kaba eh na ka bynta jongno jongno kiba dang thymmai ban rung hapoh Parliament bad ba ngin nym lah ban leh bha kum kiwei pat kiba la dep ban don lypa hapoh jong ka,” u la ong.
Shuh shuh u la bynrap, “Na ka bynta jong nga shimet, nga la ju ïakren bad ki briew ba ka long kaba donkam ban phah ïa uno uno uba la dep ban sngewthuh lypa ïa ka jinglong jong ka Parliament bad ka rukom treikam ka jong ka ban ïa kaba phah da uba thymmai namar ka ar snem kan nym long satia ka por kaba biang.”
