Shillong, Jymmang 06
Ka nongïalam jong ka Meghalaya College Teachers’ Association (MCTA) bad ka Khasi Jaiñtia Deficit School Teachers’ Association (KJDSTA) ki la mih jyndat na ka jingïalang ba la khot da ka tnad pule puthi ka Jylla ban ïakren haba ïadei ka Meghalaya Non-Government Schools and Colleges Employees Centralized Fund Scheme 2026.
Ïa kane ka jingïalang la pynïaid da u Commissioner & Secretary ka tnad Pule Puthi ka Jylla u Vijay Mantri bad ka jingmih jyndat jong ki na kane ka jingïalang ka long namar ka jingbym sngewïahap ba ka Sorkar ka khlem kynthup lang ïa ki kynhun ba don bynta lang bad ka jingdon bynta lang ki nongtrei Bank ha katei ka jingïalang.
U President ka KJDSTA Bah Bosswell Pala u la ong ba ka jingmih jong ki na jingïalang ka long namar ba kim sngew don jingmut ban bteng ïa ka jingïakren ha ka jingbym ïadonlang ki kynhun nongtrei Deficit. “Na ka MCTA, ki President bad Secretary ki la wan, na ka KJDSTA, ki President bad Secretary ki la wan bad ngi la mih namar ba kam don jingmut ban ïakren” ula ong.
U Bah Bosswell u la pynpaw ba ki kyndit ban lap ba ka Garo Hills Deficit School Teachers & Employees Association bad ka Meghalaya College Non-Teaching Employees Association ki khlem shah kynthup ha kane ka jingïalang. “Haba ïohi ïa ki kyrwoh khubor, ngi la kmen ba ki nonghikai deficit kin ïoh ban kynduh ïa ka Sorkar, hynrei kaba pynkyndit ïa ngi, ngi lap ba shiteng na ki nonghikai ki skul deficit kaba mut ka GHDSTEA bad MCNTEA kim shym la shah kynthup ha kane ka jingïalang” u la ong.
“Lada phi dei kiba sngap ïa ki jingsngewkhia jong ki nonghikai Deficit bad ki nongtrei, khot lang ïa baroh ki nongtrei Deficit” ula ong.
Ka Association ka la kyntait ïa ka rai jong ka Sorkar ban pyntreikam ïa ka CPF scheme 2026 bad ka la dawa ban phaidien biang sha ka ‘Draft Scheme ba la mynjur ha u 2023.
U Bah Bosswell u la ong ba ka Sorkar ka la pynbor ïa ki ban pynrung kyrteng na ka bynta kane ka skhim snem 2026 wat hapdeng ka jingsahteng ka mukotduma hapoh ka ïingkashari. “Ka Sorkar dalade ka dang ap ïa ka rai jong ka High Court, hynrei ka la shu pynbor ban register na ka bynta kane ka skhim 2026. Kumta, da ka jingbymsuk ha ka mynsiem jong ngi, ngi la kyrpad ban sangeh ïa kane, hynrei ka don kaei re kaei kaba ka Sorkar ka leh bym ïohi bad kaei kaba ngi pan ka long tang ïa kaba dei hok,” u la pynpaw.
Haba ïadei ka jingdon lang ki nongtrei ka Bank bad ki dkhot ka Board of Trustees (BOT) ba dang shu thaw, u Bah Pala u la ong ba, kim tip kaei ka HSP, hynrei ki tip ïa ka CPF bad kiwei-kiwei, kumta u la ong ba ka Sorkar ka bakla ban khot ïa ki nongtrei Bank bad ki dkhot ka BOT, “Shisha ngam ithuh ïa ki bad ngam don jingtip ïa kane namar nga dang bat beit ïa ka BOT ba shong aiñ la ka dei ka bye-law, registration ne kiwei-kiwei, kiba la leh ha u 2023,” u la ong.
U President ka KJDSTA u la kynthoh pyrshah ruh ïa ka jingpyrshang ban wanrah ïa ki nongtrei Deficit hapoh ka Meghalaya Provident Fund Act, 1969. “Ki la pyrshang ban thaw ïa ka khana ba kane ka Meghalaya Provident Fund Act, 1969 ka lah ban kynthup lang, kata ka dei ka jingpynsngewthuh bakla ïa ka hok kaba long ka jingleh bym shonghok haba ngi don ïa kane ka aiñ kaba dei thik tang na ka bynta jong ngi. Ngim lah ban pdiang ïa kata,” u la ong.
