Jowai, Jymmang 06
Ki bor pynïaid District jong ka West Jaiñtia Hills District, Meghalaya bad West Karbi Anglong District, Assam ha ka 5 tarik Jymmang kila pynlong ka jingïakynduh lang hapdeng ki nongïa-lam shnong Lapangap bad ki nongshong shnong Tahpat ha BOP Assam ha Khanduli hapoh West Jaiñtia Hills District.
Haba ïakren bad u waheh shnong ka Lapangap u Bah Deimonmi Lyngdoh u la ïathuh ba ha ka jingïa-lang ki nongïalam shnong ka Lapangap da kawei ka jingmut ki pynpaw ban ïoh rep suk rep saiñ katkum ka hok kynti jong ki.
Katba na ka liang ki Karbi ki pynpaw ba ki nongshong shnong Karbi kim pat da sngewthuh shai bha halor ka jingkem ïa ki briew kiba donkti ha kaba ïadei bad ka jingïap u Oriwel Timung kaba la jia ha ka 9 tarik Risaw 2025.
U la pyntip ba na ka liang u SP ka West Jaiñtia u la pynshai ïa ki nong Karbi, ba la dep ban kem ïa ki briew kiba donkti halor katei ka jingjia. U la pyntip ba ki Karbi kila pan por arsngi ba kin pynsngewthuh sha ki nongshong shnong jong ki halor ka jingpynshai jong u SP.
U Ma Deimonmi u khmih lynti ba hadien kitei ki arsngi ki nongshong shnong ka Lapangap kin ïoh ban rep suk rep sain kumba long mynshwa. Haba ïadei bad ka jingpynbna ban leit tur sha Secretariat, u Waheh Shnong u la ong ba ïa mynta yn pynsangeh shwa bad lada jia ba ki nongshong shnong kim ïoh ban leit rep hadien kitei ki arsngi kumba la kular da ki nong Karbi, ka Dorbar Shnong Lapangap kan sa shim pat da kawei ka rai.
