Shillong, Jymmang 06
Ka tnad pule-puthi kan sa khot ïakren biang ïa ki nonghikai jong ki skul bad ki kolej ‘Deficit’ ha ka 19 lane ka 20 tarik u Jymmang ban ïakren halor ka ‘Meghalaya Non-Government School and College Employees Centralised Provident Fund Scheme, 2026’, hadien ba la mih ki jingpyrshah haba ïadei bad ka jingïadon bynta jong katto-katne kiba shah kynthup ha ka jingïalang kaba hashuwa.
U Commissioner & Secretary ka tnad pule-puthi, u Vijay Kumar Mantri u la ong ba ka jingïalang ban wan kan kynthup ïa baroh ki seng jong ki nonghikai bad ‘Lecturer’ ‘Deficit’ bad kan ym kynthup ïa ki ophisar jong ki ‘Bank’ kumjuh ki dkhot jong ka Board of Trustees (BoT).
“Kumta ngi la rai ba ngin sa don biang ka jingïalang, lehse ha ka 19 ne 20 tarik u Jymmang bad ngin sa phah ïa ka jingpynbna sha ki baroh,” la ong u Mantri hadien ba pynïaid ïa ka jingïalang ha ka Sngi Balang.
“Ngi kwah ruh ban khot ïa kiwei pat ki seng na Ri-lum Jaiñtia bad kiwei-kiwei kiba don bynta bad ki nonghikai lem bad ki ‘Lecturer’ ‘Deficit’ – ngin khot ïa baroh bad ngin peit bad sngap ïa ki jingsngewkhia jong ki baroh,” u la ong.
U la ong ruh ba ka tnad ka la shimkhia ïa ki jingeh ba la pynpaw da ka Meghalaya College Teachers’ Association (MCTA) bad ka Khasi Jaiñtia Deficit School Teachers’ Association (KJDSTA), kiba la mih noh na ka jingïalang.
“Kumba ka long, ka jingsngewkhia jong ki ka long ba balei ki briew jong ka ‘Bank’ ki don bad balei baroh ki don, dei ban don tang ka Sorkar bad ki nonghikai ‘Deficit’. Ngi pdiang ïa ka jingsngewkhia jong ki bad katkum kata, ngin khot tang ïa ki nonghikai bad ki ‘Lecturer’ ‘Deficit’ ha ka 19 lane 20 tarik u Jymmang. Ngin sngap ïa ki bad ngin peit aïu ngi lah ban leh”, la ong u Mantri.
Ka jingïalang ha ka Sngi Balang la wan ban ïashim bynta da ki nongïalam ka MCTA, KJDSTA, ki dkhot jong ka ‘Board of Trustees’, bad ki ophisar jong ka State Bank of India. La shaniah ha ka SBI ban pyntreikam ïa ka skhim CPF jong u snem 2026 na ka bynta ki nongtrei jong ki skul bad kolej ba ïoh jingïarap.
Ha kane ka jingïakynduh, ka MCTA ka la ong ba kan kiar na kaba kren kham bniah namarba kane ka kam kaba ïadei bad ka skhim CPF ka long ‘Sub Judice’ hakhmat ka High Court jong ka Meghalaya.
Ka KJDSTA ka la pynpaw ïa ka jingsngewkhia ba ki nongïalam na kiwei pat ki thaiñ khamtam na Ri-lum Garo kim shym la don lang bad la ong ba ka jingïakren mynta ka dei ban long beit thik tang ïa ki nonghikai bad ki ‘Lecturer’ ‘Deficit’.
“Da kaba shimkhia ïa kine kiei-kiei baroh, ka tnad pule-puthi ka la rai ban khot sa kawei pat ka jingïalang ka ban kynthup ïa ki nongïalam jong ki nonghikai bad ‘Lecturer’ ‘Deficit’ na ki bynta bapher-bapher jong ka Jylla ban pyntikna ïa ka jingïamir jingmut kaba kham jylliew bad kaba ïashim bynta lang,” ong u Mantri.
Ka All Meghalaya Primary School Teachers’ Association ka la kyrpad ban pynlong ïa ki prokram pynsngewthuh halor ki kyndon bad ki bynta treikam jong ka skhim ba la pynbna thymmai.
Ka tnad “ka la pdiang sngewbha ïa ka jingai jingmut bad ka la mynjur ba ki sienjam jingpynsngewthuh kin long kiba myntoi na ka bynta baroh ki nongshim bynta,” u la ong. Halor ki nonghikai bad ‘Lecturer’ kiba la shongthait – kiba bun ki la pan jingbit ban sei 100% ïa ka pisa CPF kaba la lum ha ki ‘Account’ jong ki.
“Hadien ba la bishar bniah, ka tnad ka la shim ïa ka rai kaba bha ha kane ka bynta bad bthah ïa ki ophisar ka SBI ban pynbiang ïa ka jingthoh kaba bniah jong baroh ki nongtrei hapoh ka 10 tarik mynta u bnai,” ong u Mantri.
U la ong ruh ba ïa ki jingkren yn sa pynshisha da ki Directorate kiba dei peit, hadien kata yn sa pynmih ïa ka jingai jingbit ka ban shah ïa ki nonghikai bad ki ‘Lecturer’ kiba la shongthait (kiba dei hok) ban leit sha SBI bad ban sei ïa ka pisa baroh. Ki nonghikai skul kiba la shongthait kiba kwah ban weng noh, ki dei ban aiti ïa ka jingkular sha la ki District School Education Officer, katba ki ‘Lecturer’ kolej ki dei ban aiti ïa kane sha ka Directorate of Higher & Technical Education. Shuh shuh u Mantri u la bynrap ba ka tnad kan ïai ap shuwa ïa ka jingmih jong kane ka kam kaba dang sahkut hakhmat ka ‘High Court’ hashuwa ban ïaid shakhmat bad ka jingpyntreikam ïa ka skhim CPF.
