Shillong, Jymmang 06
U Marcuise N. Marak myntri ba dei peit ïa ka tnad Public Health Engineering, u la ong ba ka jingslem ban pyllait ïa ka bill ki kontraktor ka dei namar ba ka Sorkar India ka buh bun tylli ki kyndon bad pynpaw ba ka sahkut dei namar ka jingbym pat aiti ki District Council ïa ka Utilisation Certificate sha ka Sorkar India.
Ïa kane u la pynpaw ha ka jingkren ha ki nongthoh khubor hadien ba wai ka jingïalang ba ka Sorkar ka la khot ïakren ïa ka Khasi Jaiñtia Government Contractor and Supplier Association (KJGC&SA) kaba la long ha ophis u Chief Engineer u Bah R. S Nongbri, kaba don ha Lachaumiere Shillong.
U Marcuise haba pynpaw ïa ka jingsngewkhia haba ïadei ki jingeh jong ki kontraktor jong ka skhim Jal Jeevan Mission (JJM), u la ong ba na ka liang ka Sorkar Jylla ka la pyrshang katba lah ban thaw ki lad ki lynti, na ka bynta ban weng noh ïa kine ki jingeh bad ban ïoh ban siew noh ïa ka bill ba sah jong ki.
Shuh-shuh u la pyntip ba u Myntri Rangbah ka Jylla un sa shimkhia ban leit ïakynduh ïa ki bor ba dei peit jong ka Sorkar Pdeng na ka bynta ban ïakren sani bad ban pynbeit ha kaba ïadei kane ka kam.
Haba ïakren ïa u Bah FD. Ramsiej Vice President ka KJGC&SA, u la ong ba ka Sorkar lyngba katei ka jingïalang ka la kular ban shimkhia ïa kane ka bynta ba ki kontraktor ka Jylla kin lah ban ïoh noh kham kloi ïa ka bill ba dang sah ban ïoh na ki kam kiba ki la dep ban pyntrei.
Shuh-shuh u la pynpaw ba kiba bun ki bill kiba kim pat ïoh ka dei naduh u bnai Ïaïong jong u snem 2024 haduh kine ki sngi bad kaba la kot haduh 900 klur tyngka. “Kane ka jingsah ka bill ka la long ka jingeh kaba jur ïa ngi ki kontraktor,” u la ong.
U Bah Ramsiej u la ïathuh ba ha kine ki kyndiat bnai ba la dep ki la don ki kontraktor kiba la shim noh ïa la ka jingim, tang na ka daw bymlah ban siew ïa ka ram ba ki la shim na ka bynta ban pyntrei ïa ki projek.
