Shillong, Nohprah 29
Ka long ka jingsarong ïa ka Jylla Meghalaya hadien ba uwei u khynnah ba dang 14 snem na South West Khasi Hills District, u la ïoh pdiang ïa ka khusnam Pradhan Mantri Rashtriya Bal Puraskar (PMRBP) namar ki kam shlur bad len lade.
Une u khynnah u kyrteng u Kisen Wanniang, uba la pyllait im ïa saw ngut ki khynnah na ka jingngam jyllop hapoh ka Wah Maweitksar, kaba don ha Mawlangwir, South West Khasi Hills District. Ïa kane ka khusnam, u heprit Kisen u la ïoh pdiang na ka kti jong ka President ka Ri ka Droupadi Murmu ha ka jingïalang kaba la long ha ka 26 tarik mynta u bnai ha nongbah New Delhi.
Kane ka jingjia ka la jia ha ka 25 tarik Jymmang 2024 ha ka por kumba 10 baje mynstep. Ha kane ka sngi, 4 ngut ki khynnah ba hapoh 12 snem, kita u Heprit Gidian Thongni ba 9 snem, Naphisadona Thongni ba 11 snem, Haphibansuk Thongni ba 10 snem bad Carefully Thongni ba 12 snem, ki la leit jngi pyngngad ha kane ka wah hynrei kyndit-kynsan u heprit Kisen Wanniang uba dang saitjaiñ, u la ïohsngew ïa ka jingpyrta bad jingpan jingïarap bad mar mar hi u la mareh bad u la kynthih sha kane ka wah bad ïoh pyllait im lai ngut napdeng kitei.
Ki briew ba don marjan ruh ki la mareh ban ïarap lang da kaba pyndonkam ïa ka jaiñ bad ki la ïoh tan ïa iwei pat sha ryngkew.
Ka Dorbar Shnong Mawlangwir bad ki bahaïing bahasem jong kine saw ngut ki khynnah ki la pynpaw ïa ka jingsngewnguh bad ai ka jingkhublei ïa u heprit Kisen Wanniang uba la len lade ban pyllait im ïa kine ki khynnah.
Ka Pradhan Mantri Rashtriya Bal Puraskar ka dei ka khusnam ba heh duh ba ju ai sha ki nongshong shnong ka Ri India ha ka ban pynkup burom ïa ki khynnah kum ka jingithuh ïa ki kam shlur bad ka jingshakri ha ka imlang sahlang. Ki nongïoh khusnam ha kane ka kynti la jied na ki 14 tylli ki Jylla bad ki Union Territories.
