Shillong, Nailar 06
Ka Voice of the People Party (VPP) ha ka sngi Palei jong ka taïew, ka la mih ban tur bad ker tawiar ïa ka Secretariat ha ryngkat da ki hajar ngut ki paidbah nongkyrshan, kiba najan bad najngai.
Kane ka jingleit tur ka VPP sha Secretariat, kadei ban pynbor ïa ka Sorkar Jylla ban shimkhia ne ban leh ei-ei noh haba ïadei bad shibun tylli ki mat kiba ka VPP ka la dawa la slem, kiba dei ki mat ba ktah ïa ki paidbah.
La sdang ka jingtur sha Secretariat na Mawbynna, marjan bad ka All Saint School, hapoh ka jingïalam u Bah Ardent Miller Basaiawmoit, President ka VPP, ha ryngkat ki MDC, MLA na ka party bad ka jingsynranlang da kiba bun ngut ki nongkyrshan.
La don ruh ki paidbah nongkyrshan kiba la mih ban tur sha Secretariat nakhmat ka ophis u Deputy Commissioner (DC) East Khasi Hills District, bad ban ïakynduh lang ha khyrdop Secretariat, ha kaba ki paidbah nongkyrshan ki la ïa rah da ki plakad pynrem ïa ka Sorkar Jylla, hapoh ka jingïalam ka party NPP.
Ka VPP ryngkat ki hajar ngut ki paidbah, ki la ïaid pyllun ïa ka Secretariat haduh ar sien, da ka jingïaid kaba jaijai khlem da don kano-kano ka jingpynmih huri hura ne pynmih jingkulmar, hynrei ka long tang ka jingmih paidbah ban pynsngew sha ka Sorkar ïa ki mat kiba ka party ka la dep ban dawa.
Ka VPP hapoh ka jingïalam u Bah Powell Sohkhlet, MDC ka Mawthadraishan Konstitwensi, ki la pyrta pynrem jur ïa baroh ki party kiba synroplang bad ka NPP, kaba synshar ïa ka Jylla mynta, da kaba ong ‘Down down’ HSPDP, BJP, NPP, UDP bad kiwei-kiwei de.
La sakhi ruh ba ki bor pulit hashuwa ba ka VPP kan sdang ïa ka jingleit tur sha Secretariat, ki la pynkhreh ki tum ki tam bad ki bom pynsat khmat, ba lehse kan mih ka huri hura, hynrei phewse ka VPP ryngkat ki hajar ngut ki paidbah, ki la leit ban shu ker tawiar ïa ka Secretariat, khlem da pynmih kano-kano ka huri hura, tang kum ka jingpynsngew sha ka Sorkar ïa ki mat jingdawa.
Hadien ba ka VPP bad ki hajar ngut ki nongkyrshan ki la leit tur sha Secretariat, kam shym la don ka jingpakhang lynti na ki bor district ne ha ki pulit, ha kaba ki bor district ki la shah ïa ka VPP ban ïaid da kaba jai-jai bad ïaid pyllun ïa ka Secretariat.
Ki mat jingdawa ka VPP, ha kane ka jingïaid paidbah ka dei halor ka projek Lumpongdeng ryngkat ban pyllait ïa ka White Paper, ka jingpynlong ïa ka eksam thungkam da ka kynhun ba laitluid ba ju leh lyngba ki DSC, MPSC bad kiwei ki agency thungkam, ka jingïada kaba khlaiñ ïa ka hok ki trai ri trai muluk, thaw aiñ ban teh kyndon bad ithuh ïa ka jingdon paid ki trai muluk, ai biang ïa ka hok ki nongshong dukan madan, ithuh ïa ki khlieh nongsynshar shnong bad ki Dorbar jong ki, pyrkhing ïa ki karkhana coke bad dewbilat, ïada ïa ki wah, pynkut ïa ka jingtih shyiap bad maw pathar bad ka jingbret ïa ki jaboh sha ki tyllong um bad ka jingleh tyngeh pyrshah ïa ka jingtih dewiong beaiñ, khaïi bad ki kynhun kiba kynnoh donkti.
Kane ka jingïakhih, ka la wan jia ruh tang lai taïew shuwa ka Dorbar Synrai jong ka Ïingdorbar Thawaiñ ka Jylla, ka ban long ha ka 24 haduh 28 tarik Nailar, ha kaba ka Liang Pyrshah kan sa ïakren ïa kine ki ishu lyngba ka jingïatai, jingbuh jingkylli bad ki motion hapoh ka Ïingdorbar.
Ka VPP ka la pynkut ïa ka jingïakhih paidbah ha Additional Secretariat, ha kaba u Bah Ardent u la kren sha ki paidbah haba ïadei bad ki mat jingdawa ka seng.
