Shillong, Nailar 06
U Dr. Batskhem Myrboh uba dei u kyrtong ka VPP ban ïakhun ïa ka ilekshon MP Lok Sabha na Shillong Constituency u la ai khublei ïa ka Executive Committee jong ka NEHU kaba la ai jingbit ïa u ban ïakhun ïa ka ilekshon shiteng samoi.
Haba ïakren bad ki nongthoh khubor hadien ba la wai ka jingïalang ïaid paidbah ka VPP ha Secretariat u Dr. Batskhem u la ong ba ka seng VPP kam pynleit jingmut ïa kiwei ki kyrtong ne na kiwei ki seng saiñpyrthei hynrei ka shaniah ha ka VPP bad ha ka jingstad jong ki paidbah ban ai jingkyrshan.
U la kyntait ruh ba kam don jingeh ïa u ban ïakhun ïa kane ka ilekshon MP watla u hap ban ïakhun pyrshah ïa u Dr. DRL Nonglait u kyrtong ka NPP namar ka seng ka don la ka jong ka nongrim.
“Nga sngewskhem ba ka VPP kan jop biang ha kane ka ilekshon namar ngi don la ki jong ki mat ba ngin kren ïa ka jingeh jong ki paidbah” u la ong.
“Shuh shuh u la pynkynmaw haba la seng ïa ka VPP ha u snem 2021 ha ka por ba lyngkot hynrei ki paidbah ki la ai jingkyrshan haduh mynta ruh” u la ong.
Kumban shu pynkynmaw, u Dr. Batskhem u dei u nongaiktien jong ka VPP naduh ba la seng ïa ka bad u long ruh uba tbit ban jubab lada wan ki jingkynthoh na kiwei ki seng saiñpyrthei bad u long uba shemphang ban pyni ïa ka nongrim jong ka VPP.
Hynrei hadien ka jingkhlad noh u Dr. Ricky AJ Syngkon ka VPP ka la ai tiket ïa u Dr. Batskhem ba un ïeng ban ïakhun ïa kane ka ilekshon shiteng samoi ha kaba ka Election Commission of India kan sa pynbna noh shen ïa ka tarik thep vote.
Kane ka jingïoh ban ïakren ki nongthoh khubor ïa u Dr. Batskhem ka dei hadien ba u Bah Ardent Basaiawmoit u la pynkut ïa ka jingïaid paidbah ban tawiar ar sien ïa ka Secretariat bad pynkut hakhmat ka ophis u Deputy Commissioner East Khasi hills district.
