Nongstoiñ, Nailar 06
Ha ka 11 tarik Nailur, 2024 la ïoh pdiang ïa ka FIR na ka nongujor kaba la ïathuh ba ka para jong ka, kaba dang 17 snem ka rta ka la shah rahbor bad shah leh beijot ha u Francis Iawphniaw bad u David Syiemlieh.
Ka kyrwoh khubor kala ong ruh ba katkum kane, la register ïa ka mukotduma No. 18(9)2024 jong ki pulit ka Mawshynrut hapoh ka kyndon 5(g)(k)/6 jong ka aiñ POCSO ba la pule ryngkat bad ka kyndon 137(2) jong ka Bharatiya Nyaya Sanhita (BNS).
Shuh shuh ïa kane ka mukotduma la tohkit da ka WPSI Batlarity Dkhar, ha kaba ynda la dep ka jingtohkit la aiti ïa ka charge-sheet katkum ki kyndon 5(g)(k)/6 jong ka aiñ POCSO ba la pule ryngkat bad ka kyndon 137(2) jong ka BNS.
Ha ka 31 tarik Naitung, 2026, ka ïingbishar jong u nongbishar ba kyrpang (POCSO), Nongstoiñ, hadien ba ka la ïit bad bishar bniah ïa baroh ki sakhi sabut ba la lap ha ka jingtohkit, ka la rai pynrem ïa u Francis Iawphniaw bad u David Syiemlieh.
Ka khubor ka ong ruh ba ka ïingbishar ka la rai pynrem ïa baroh arngut ki nongshah pynrem ba kin shah set phatok haduh 20 (Arphew) snem ha ka jingshah set phatok ryngkat bad ka kuna kaba T.1,00,000/- tyngka (Shi Lak tyngka) na ka bynta ka kam runar kaba lah ban pynshitom katkum ka kyndon 6 jong ka POCSO Act.
Nangta la ong ruh ba lada kim lah ban siew ïa ka kuna, kin shah set phatok sa shi snem katkum ki kyndon 5(g)(k)/6 jong ka aiñ POCSO namar kane ka kam leh beijot jong ki.
Shuh shuh, na ka bynta ka kam runar kaba lah ban pynshitom katkum ka kyndon 137(2) jong ka Bharatiya Nyaya Sanhita (BNS), la rai pynrem ïa ki nongshah pynrem ba kin shah set phatok 6 (Hynriew) snem ryngkat ka kuna kaba T.50,000/- (Sanphew Hajar). Lada kim lah ban siew ïa ka kuna, kin sa shah set phatok biang sa shisnem.
