Shillong, Nailar 06
Ki paidbah kiba la wan ban kyrshan ïa ka jingïakhih ka Voice of the People Party (VPP) ha Secretariat ha ka sngi Palei ki la pynpaw ka jingsngewkhia kaba jur halor ka jingsngap mynthi ka Sorkar Jylla ïa kiba bun ki mat jingdawa jong ki paidbah.
Haba kren sha ki nongthoh khubor ki longkmie ki la pynpaw ba ki wan ban shimbynta lang ha kane ka jingïakhih ka long ban ai ka jingkyrshan ïa ka VPP, namarba ka jingïakhih ka dei na ka bynta ka lawei jong ki khun ki kti jong ki.
Haba ïoh ban ïakren shuh-shuh ïa kiba wan ha kane ka sngi ki la kynnoh ba ka Sorkar MDA ka la lehbeiñ sha ba palat ïa kiba duk, kiba rit ba ria bad ki nongrep, da kaba ki la ong ba ka Sorkar kam phai khmat satia sha ki, namar kata ki la kyntu bad kyrpad ïa ka Sorkar ba kan phai khmat lem sha baroh ki liang. “Ha ka jingshisha ka Sorkar ka dei ban peit bad sngewthuh lem ïa ka jingeh jong ngi ki rit ki ria, khnang ba ka lawei jong ka Jylla kan long kaba bit ba biang” la ong uwei u rangbah.
Haba jubab ïa ki jingkylli, ki la ong ba mynta kiba ïohkam ïohjam ki dei beit tang kiba don ka jingïa ithuh ithaw bad kiba don ha ka Sorkar, namar kata ki la pynpaw ïa ka jingbynñiaw ba kumno ka jaidbynriew Khasi kan kiew ha ki sngi ki por kiba dang wan, namar ki khun samla ki lyngnga ba ym ïoh kam ïoh jam.
Haba ïoh ban sngap ïa ka sur jong ki paidbah, ki pynpaw ba ki don ka jingkyrmen ba skhem ba kan wan ka jingkylla ha u snem 2028 bad ba ka Sorkar kan pynurlong ïa ki jingdawa jong ki paidbah.
