Shillong, Nailar 06
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Yumnam Jetly Meitei u la ai ka jingujor ba ha ka 3 tarik mynta u bnai, ha ka por kumba 9 baje mynstep, ki runar bym lah ban ithuh ki la tuh ïa ka laptop na ka ïing jong u, kaba don ha Cleve Colony, Dhankheti, Shillong.
Ka Archana Gandhi ka la ai ka jingujor ba ha ka 3 tarik mynta u bnai, ki runar bym lah ban ithuh ki la rung beaiñ shapoh ka phyllaw ïing ka jong ka, kaba don ha Pynthorumkhrah, Shillong bad ban tuh ïa hynñiew jur ki juti.
Katba na ka liang jong u Rahul Dev u la ai ka jingujor ba ha ka step jong ka 3 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-W-2135 na ka thaiñ Rilbong, Shillong.
U Praphul Kumar Giri ruh u la ai ka jingujor ba ha ka 3 tarik mynta u bnai, u la lap ba ka arshaka ka jong u, kaba don ïa u registration number AS11-AG-5306 la lap ba ka la jah rngai na Umsahi, Lumshnong (EJH).
Kumjuh ruh na ka liang jong u Dijeng Marak u la ai ka jingujor ba ha ka por mynsngi jong ka 3 tarik mynta u bnai, u la lap ba ka arshaka ka jong u, kaba don ïa u registration number ML08-J-2801 ka la jah na ka ïew Chibinang (WGH).
Ha kawei pat ka khubor, u President ka DNA Model HS School, Bhaitbari (WGH) u la ai ka jingujor ba ha ka 2 tarik mynta u bnai, ar ngut ki briew ki la tuh ïa uwei u bateri, inverter, ar tylli ki CPU, kawei ka projector bad uwei u Jio wifi router kiba shongdor kumba T.1.09 lak na ka skul. Hynrei ïa kane ka jingjia baroh la ïoh ban ring dur hapoh ka kor CCTV.
U Secretary jong ka Mendipathar Multi-Purpose Co-operative Society Ltd., (NGH) u la ai ka jingujor ba ha ka 4 tarik mynta u bnai, kata ha ka por mynstep, ki runar bym lah ban ithuh ki la tuh ïa ki rubber sheets na ka phyllaw jong ka Society.
