Shillong, Nohprah 29
Ka Hynñiewtrep Youths’ Council (HYC) ka la pynrem jur ïa ka jingleh jong u Akash Sagar hapoh jong ka ïingmane ha Mawlynnong bad ong ba kane ka long ka jingthombor ïa ki riewngeit Khristan bad ka dei ruh da ka jingthmu ban pynmih ïa ka jingsngew pher niam ha ka jylla.
Ha ka kyrwoh na u President ka HYC, Bah Roy Kupar Synrem u la ong, “Ka seng ka pynrem tyngeh ïa ka jingleh khlemakor u ‘Akash Sagar’ hapoh ka ïingmane ha Mawlynnong. Kane ka dei ka jinghiar thma ïa ki riewngeit bad kiba don ïa ka jingngeit ha ka niam Khristan bad katei ka dei ruh ka jingpyrshang ban pynmih ïa ka jingïapher niam ha ka Jylla bad ban pynbor ïa ka mat ne ‘Agenda’ jong ki heh paid ïa kaba ym lah ban pdiang satia”.
Ka HYC ka la dawa na ki bor pulit ba ki dei ban kem mardor ïa une u briew bad kiba don ryngkat lem bad u lada don bad dei ban pynthikna ba u dei ban mad ïa ka jingshah pynsaja ïa ka jingleh ka jong u katkum ki kyndon jong ka aiñ. Dei ban pyni ïa ka nuksa, da ki bor kiba dei khmih kiba don ha ka jylla ha kaba ïadei bad katei ka jingjia khnang ba kum katei ka rukom leh kan ym ïai bteng biang ha ki snem ki ban wan bad ym dei ban don uno-uno ruh u ban don ïa ka bor ban ñiew beiñ ïa ka niam Khristan ha ka jylla.
U President ka HYC u la kyntu ruh ïa ka Sorkar bad ïa baroh kiba don bynta, khamtam eh ïa kito kiba don bynta ha ka kam jngohkai ba kim dei ban kheiñ sting ïa katei ka rukom leh hynrei ki dei ban pynsngewthuh ïa ki paidbah mardor khamtam ïa ki nongjngohkai kiba wan jngohkai ïa ka jylla ba kin long kiba adkar ha kaba ïadei bad ka jingsngew jong ki paidbah ka jylla, kiba don ha kano kano ka niam ne jingngeit bad dei ban don ruh ïa ki kyndon treikam kiba dei ban leh ne ki bym dei ban leh haba leit jurip ïa kino kino ki jaka jngohkai bad khamtam ïa ki jaka niam kiba kongsan.
