Shillong, Nohprah 29
Ka United Democratic Party (UDP) ha ka sngi Saitjaiñ ka la kyntu ïa u Myntri Rangbah ka Jylla, u Conrad K Sangma ban pynkynriah noh shwa ïa ka eksamin HSSLC kham shadien namar ba ka ïatyngkhuh bad ka ilekshon MDC.
Ha ka shithi ba la phah sha u Myntri Rangbah, u President ka UDP, Bah Metbah Lyngdoh, u la kdew ba ka eksamin HSSLC kan sdang naduh ka 10 tarik haduh ka 21 tarik u Rymphang 2025 bad ka ïatyngkhuh bad ka jingpynkhreh jong ki seng saiñpyrthei ïa ka ilekshon MDC bad kumjuh ruh ïa ka jingthep ‘vote’ ka ban long ha ka 21 tarik u Rymphang 2025.
“Hadien ka jingïohpdiang ïa kiba bun ki jingujor na ki paidbah babun balang, nga kwah ban buh ka jingkyrpad sha phi ban sngewbha ban pynkynriah noh ïa ka tarik ban pynlong ïa ka eksam HSSLC sha ki tarik kiba kham shadien khnang ba ki samla pule kin ym shah ktah,” la ong u Bah Metbah.
Ha kajuh ka por, ka UDP ka la pynkhreh ban pyllait noh ïa ka thup kyrteng ka ba-ar jong ki kyrtong ha ka 30 tarik u Nohprah ha ka ophis treikam jong ka seng.
U General Secretary ka UDP, Bah Jemino Mawthoh, u la pyntip ba kine ki kyrtong ki dei ki ban ïakhun ïa ka ilekshon MDC jong ka KHADC bad JHADC.
U la pyntip ba katei ka thup kyrteng kan kynthup ïa ka kyrteng jong 10 ngut ki kyrtong ki ban ïakhun ïa ka ilekshon na ar tylli ki District Council.
