Shillong, Jylliew 25
U Bah HS Suting, Chairman ka Good Samaritan Society Cum Drop-In Center, ka Counselling Center kaba don ha Khlieh Ïewduh u la ïathuh ba ki don 35 ngut ki Samla kiba kyrni ha ki jingdih pynbuaid, ba kynthup u drok, kiba la wan sha katei ka jaka ai jinghikai ne pynsngewthuh shaphang ka jingsniew u drok, kiba la long ba la kloi ban iehnoh ïa u drok.
“Ïa kine ki 35 ngut, na ka liang ka society ka la phah sha Rehab Centre bad ki don 10 ngut kiba la lait na u drok,” la ong u Bah HS Suting haba kren sha ki lad pathai khubor ha ka sngi Palei jong ka taïew.
Kane ka Counselling Centre kaba ju ai mynsiem ïa kiba dih drok ban kiar na u, kadei kaba la kyrshan da ka Sorkar lyngba ka tnad Social Welfare bad bun na ki kidei kiba wan na ka longïing kaba duk bad la phah ïa ki sha Rehab Centre, ban ïoh jingsumar kaba khlem donkam ban siew.
U Bah HS Suting u la ong ba watla ka Social Welfare ka ïarap ïa ki, hynrei ki don ki jinglut kiba ki hap ban pynlut na ka bynta ban ïarap ïa kine kiba kyrni ha ki jingdih pynbuaid, lada ki wan sha ki ban pan jingïarap.
Kumta u la ong, ba kane ka Good Samaritan Society ka ai ka jingsngew shngaiñ ïa kiba donkam ka jingïarap.
“Kiba wan ha ka jingshah ai jinghikai ha Ïewduh, kiba bun hi kidei ki samla ki bym shym la don shuh ki nongpeit haïing hasem. Bad ki la don palat 200 ngut kiba la wan ha ka jingshah hikai ha Ïewduh bad ki don 35 ngut kiba la shim ka sienjam ban iehnoh ïa u drok,” la ong u Bah HS Suting.
U la bynrap ba ki samla kiba kham don kham em, kim da bun ba wan ha katei ka Counselling Centre hynrei kiba bun hi kidei kiba wan na ka longïing ba duna ha ka ïoh ka kot.
