Shillong, Jylliew 25
Ka ophis jong ka District Social Welfare Officer, East Khasi Hills ha ka jingïasnohkti lang bad ka ‘Good Samaritan Society Outreach & Drop-In Centre ha ka 25 tarik u Jylliew 2026, ka la rakhe ïa ka International Day Against Drug Abuse and Illicit Trafficking, kaba la long ha Community Hall Mission Compound.
Ha kane ka jingrakhe, ka la don ruh ka jingïakren bad ka jingïaphylliew jingmut haba ïadei bad ka jingkyrni ki Samla ha u drok, bad kumno ban ai jingïarap sha ki Samla ba kin lait na kine ki jingdih pynbuaid ha u drok.
Ka jingïaphylliew jingmut kaba la don lang naduh ki Nonghikai, ki Longkmie Longkpa, ki Rangbah Shnong, ki bor pulit, ki nongïalam Balang, Seng longkmie bad kiwei-kiwei de ki nongïalam.
Ki rangbah bad ki longkmie haba kren ha kane ka sngi, ki la pynpaw ka jingsngewsih ba bun ki Samla kiba la leit ai jinghikai sha ki Rehab Centre, hynrei ynda ki la wan phai sha ïing, kaba la pynthikna ba ki la koit la khiah, hadien kumba katto katne, kine ki Samla ki la ngop biang ha u drok.
Shuh shuh ki la ai jingmut ba ka ïing ka sem jong ki Samla kiba la ngop ha u drok, kin sngewbha ban ïatreilang, khnang ba ki khun jong ki, kin lait noh na ka jingkyrni ïa u drok bad ba kin im ka jingim kaba thymmai.
Ki la ai jingmut ba kadei ban don ka jinghikai kaba biang na ka bynta ki Samla kiba la kyrni ha u drok bad ym dei ban lehraiñ haba ki khun ki la ngop ha u drok namar lada ki bahaïing hasem ki buhrieh ka jingïakhun ïa u drok kan shem jynjar.
Kumta ki la ai jingmut ba ki bahaïing hasem kin wanrah ïa ki khun kiba la ngop ha u drok sha ka Shnong, khnang ban wad ki lynti ban ai ka jingïarap ïa ki.
Ka Dr.W Shira, Psychiatrist, MIMHANS Sorkar Jylla ka la ong ba kane ka jingjyllei u drok bad ki jingdih pynbuaid, ym dei tang ha ka Jylla hynrei kadei ha baroh ka pyrthei, bad ka jingïakhun ïa kane kam dei tang na ka bynta ka Sorkar ne ka Health Sector, hynrei kadei ïa baroh kum ki bahaïing hasem, ki shnong ki thaw bad kumjuh ruh ki sengbhalang.
“Dei tang ka jingïatreilang bad snohkti ban ïakhun ïa kane, ban ngin ïoh ïa ka jingjop,” ka la ong.
Haba ngi ïakren ïa ka jingkyrni, ngi sngewthuh ba kadei ka jingpyndonkam sniew lane ban pyndonkam ïa ka mar ba ma bad ba pynlymwir jingmut, ba kynthup ka kyiad bad u drok, kaba la khang bad mana. Ki drok pat ki kynthup ïa ki dawai kuli, ne ki dawai jyrhoh ba bun jait, la ong ka Dr.W Shira.
“Kiba dih drok bunsien ki die lut ïa ki mar na ïing, kim salia ruh wat ban die ïa ka met lajong bad bunsien kiba kyrni ki kylla nongdie drok kylla namar ki hap ïakhun tang ban im. Lada kim ïoh ïa u drok kim lah ban im,” ka la bynrap.
