Shillong, Jylliew 25
Ka jingkhlad ki riew paidbah ka la poi haduh 164 ngut tang namar ka jingkhynñiuh u jumai kaba la jia arsien tang hapoh 39 sekhon ha Venezuela ha kaba ki mynsaw ki la poi haduh 971 ngut bad kiba dang jah rngai ki poi palat khadwei hajar ngut namar la suba ba ki la shah tap ha ki ïing, ki kynroh, khyndew bad kiwei de kiba la shah pynjot ha u jumai.
Kane ka jingkhynñiuh u jumai ba shyrkhei ka la jia hynnin ka janmiet sngi Balang ha kaba nyngkong la khynñiuh shwa u jumai ba heh 7.2 Magnitude bad hadien 39 sekhon ba ki paidbah ki dang ïa kulmar la khynñiuh sa uwei pat u jumai uba 7.5 magnitude.
Kane ka jingkhih u jumai ka dei kaba shyrkhei tam ha Venezuela hadien ki spah snem ha kaba la ïohsngew ha baroh kawei ka ri.
Bun ki ïing kiba heh ki la khyllem bad ki briew ki la shah ban ha ki ïing kiba la kyllon ha kaba ki briew ki la ïa mareh kulmar.
Ka jingkhynñiuh ka long kaba shyrkhei ha kaba ki paidbah ki la ïalyniar bad mareh kulmar ha kawei ka kad liengsuiñ kaba la ïohi ba ka tnum ïing ka la hap bad ki pui pui dewbilat ki la hap sha madan kaba la pynmih ka tdem hapoh katei ka kad liengsuiñ.
Ka President ba shipor katei ka ri ka Delcy Rodiguez ka la pynbna da ka “State of emergency” ha baroh kawei ka ri hadien kane ka jingjia, kumta ka la pyntikna ruh ban ai ka jingïarap bad sumar na ka bynta kito kiba ngat ha ka jingmynsaw.
Ka jingpyllait im bad ka jingwad ïa kiba dang jah rngai ba la shah ban ha ki ïing bad ki jingtei kiba la khyllem ka dang ïai bteng hapoh katei ka ri.
Ki bor synshar ki la kyntu ruh ïa ki nongshong shnong ban shong shabar namar ïoh don ki jingtei ne ki ïing jong ki ban sa khyllem biang. Bun ki briew ki la shu shong shabar, don kiba shong ha ki surok, ki lynti ïaid kjat, don ruh kiba shong ha ki jaka ap kali bad kiwei pat ki jaka paidbah.
Bun ki phone kim ïoh lain shuh ban pyntip ne phone ïano ïano namar la jah ka network.
Ki ri ka pyrthei ba kynthup ka US bad ka India ki la tyrwa jingïarap ïa kane ka ri kaba mad jingeh ha kane ka por.
