Shillong, Jylliew 25
Ka Hynñiewtrep Youths Council (HYC) Dangar Balat Border Circle ha ka 25 tarik u Jylliew 2026, ka la pynlong ïa ka Sier Lapalang Operation, ban talasi ïa ki Trading Licence, Work Permit lane Labours Licence ïa ki bar jylla ha ka thaiñ khappud, kum ha ïew Balat ha Dangar hat bad ha kiwei ki jaka.
Ha kane ka jingleit khynra Trading Licence, Work Permit jong ka seng, kaba pynlyngngoh ka long, ba kim shym la lap ba tang kawei ruh ka dukan ba ki la dep ban pynthymmai (renew) ïa ki lisen lane Work Permit jong ki.
Ha ka kyrwoh ba la phah da ki nongïalam ka HYC Balat Border ki la pynpaw ïa ka jingsngewkhia halor kane ka jingbym shym la pat pynthymmai ki bar jylla ïa ki kot ki sla ban die dukan.
Kumta ki la phah ïa ka kyrwoh kaba shai sha ki paidbah ka dong ka thaiñ bad kumjuh sha ka ri bad jaitbynriew, ba ka la ai por ïa ki, ba kin pyndep ïa ka jingleit pynthymmai ïa ki Trading Licence bad ïa ki Work Permit jong ki, da kaba bthah ba kin pyndep la kumno kumno hapoh shibnai.
Nalorkata, ka HYC ka la maham ruh ba lada kim lah ban pyndep ïa ki jingpynthymmai ïa ki Trading Licence, lane Work Permit jong ki, ka seng hi kan sa shim da ki sienjam ba kham tyngeh.
