Ym donkam ban sheptieng halor ka jingsaphriang ka HMPV ha China, ong ka tnad ka koit ka khiah

"... lym kumta, ym donkam ban sheptieng halor kane ka jinglong-jingman ba mynta," ong u Dr. Goel.

New Delhi, K’Lyngkot 03

Ka tnad ka koit ka khiah ka Sorkar Pdeng ha ka Sngi Thohdieng ka la ong ba ka India ka dang peitngor ïa ka jinglong-jingman haba ïadei bad ka khubor jong ka jingpang Human Metapneumovirus (HMPV) kaba la saphriang ha China bad pynpaw ba ym donkam ban sheptieng halor kane ka bynta.

U Director General of Health Services (DGHS), Dr. Atul Goel haba kren sha ki lad pathai khubor u la ai jingmut ban shim ïa ki lad jingïada kumba ju long haba ïadei bad baroh ki jait jingpang ring bad pynhiar mynsiem (respiratory infections).

“… lym kumta, ym donkam ban sheptieng halor kane ka jinglong-jingman ba mynta,” ong u Dr. Goel.

“Ki la don ki khubor kiba la mih ka jingsaphriang u khñiang ‘Metapneumovirus’ ha China. Ngan kren da kaba shai halor kane. U khñiang ‘Metapneumovirus’ u long kumba long lem kiwei pat ki khñiang jingpang ba ring bad pynhiar mynsiem kiba ïalam sha ka baïong-khlieh, bad ha kiba la tymmen bha bad kiba dang khynnah bha, ka lah ban ïalam ne pyni ïa ki dak jong ka jingpang ‘Flu’,” ong u Dr. Goel.

“Ngi la khmih bniah ïa ki jingtip halor ki jingpang ring bad pynhiar mynsiem hapoh ka ri. Kam shym don kano-kano ka jingkiew kaba jur katkum ki jingtip jong u bnai Nohprah, 2024 bad ym shym la don kano-kano ka jingpang kaba saphriang ha bun bah ki briew na kino-kino ki shlem treikam jong ngi,” u la ong.

U Dr. Goel u la ong ruh ba lada don la kumno-kumno ka jingkiew ha ka jingsaphriang jong ki jingpang ring bad pynhiar mynsiem ha ka por tlang, ki jaka sumar ki long ba la khreh ha ka liang ki jingdonkam bad ki jingthiah kumjuh.

“Kawei kaba nga kwah ban pynsngew sha ki paidbah ka long ban shim ïa ki lad jingïada ba kyllum kiba ngi pyndonkam na bynta baroh ki jingpang ring bad pynhiar mynsiem, kaba mut lada don mano-mano ba jyrhoh ne baïong-khlieh, phi dei ban kiar na kaba ïakynduh bad kiba bun ki briew khnang ba ka jingpang kan ym saphriang,” u la ong.

Shuh shuh u la bynrap, “Pyndonkam da ka jaiñ kti ne jaiñ khuid kaba kyrpang haba jyrhoh ne synriah bad dih ïa ki dawai kiba tikna bad kiba donkam na bynta ka jingpang baïong-khlieh ne shit-met ha kano-kano ka por ba ka don, lym kumta ym don eiei ban sngewtieng ïa ka jinglong jingman kaba mynta.”