Jowai, K’lyngkot 05
Sa shisien ki nongshong shnong jong ka Lapangap ha West Jaiñtia Hills District kaba hap ha khappud bad ka shnong Tahpat jong West Karbi Anglong District, Assam ki la ngat biang ha ka jingshah pyntieng-pynsmiej bad byrngem-byrsit ha ki nongïalam jong ka jaidbynriew Karbi kiba kam trai ïa ki jaka ki puta kiba don ha ka khappud jong ka shnong Lapangap.
Ha kane ka sien, ar ngut ki nongrep jong ka shnong Lapangap katba ki dang rep dang riang ha ka lyngkha jong ki kaba dang hap hapoh u pud u sam jong ka shnong Lapangap, ha ka step jong ka sngi Saitjaiñ ki la shah maham ha ki paidbah jong ki jaidbynriew Karbi ba ki dei ban pynrung kyrteng noh ïa ka jaka rep jaka riang jong ki sha Assam hapoh ar bnai lym kumta kin ym ïoh lad shuh ban ot kba ne ban rep ban riang shuh.
Kitei ki nong Karbi ki la kam ïalade kum ki nongïalam jong ka Karbi Students Association bad la ïalam ïa katei ka kynhun da u President jong ka Socheng Amreng Border Development Committee u Augustine Hanse. Katei ka kynhun ka la ong ruh ïa kitei ki nongrep ba kim donkam ban siew pisa eiei ban pynrung kyrteng ïa ki jaka jong ki sha Assam bad ki donkam ban ai tang u nombar Aadhar jong ki.
Na ka liang kitei ar ngut ki nongrep ki la pyntip mar-mar ïa kane ka jingjia sha u Waheh Shnong jong ki, Ma Deimonmi Lyngdoh bad na ka liang jong u Waheh Shnong ruh u la ai jingtip mar-mar sha ki pulit jong ka jylla Meghalaya.
Haba ïakren bad u Ma Deimonmi Lyngdoh, u la pynpaw ïa ka jingsngewkhia jong u halor ka jingshah byrngem-byrsit jong ki nongrep na ka shnong katba ki dang rep dang riang ha ka lyngkha jong ki kaba dang hap hapoh u pud u sam ka shnong Lapangap.
Shuh shuh u la ïathuh, ba ki nongshong shnong ki la register ïa la ki jaka ki puta, ki pynthor ki lyngkha bad ka JHADC, bad kumta u khmih lynti ba ka JHADC kan ïeng ban ïada ïa ka hok jong ki nongshong shnong jong ki.
