Nongstoiñ, K’lyngkot 05
Hadien shisnem pura ka shnong Umkap hapoh ka jingïalam u Bah Jeremiia Dkhar kum u Sordar shnong ha ka sngi Saitjaiñ ka la shna biang ïa ka jingkieng ha ka wah Ryndi kaba la shah rong noh ha u snem ba la dep.
Ha katei ka sngi ki paidbah nongshong shnong ka Umkap ha West Khasi Hills ryngkat ka mar shilliang shnong ka Rongchong ha East Garo Hills, ka la ïoh ban shna lang ïa ka jingkieng kum ka dak ka jingïarap lem ïa ki paidbah nongshong shnong ka Umkap.
U Sordar shnong ka Umkap, Bah Jeremiia Dkhar haba kren sha ki lad pathai khubor u la pynpaw ka jingsngewnguh ïa ki paidbah nongshong shnong bad ki paralok Garo ba la wan ban ïarap lem ha ka ban shna pynbha ban pyllait ïaid kali ban kam sha shilliang ka Wah Ryndi.
“Ngi la ïoh ruh ban pynbha ïa ka jingkieng ïaid kjat kaba lah ban ïaid tang ki briew bad ar shaka,” ong u Bah Jeremiia.
U la ïathuh ruh ba ki nongshong shnong ki la pynlut por kumba ar sngi ban shna biang ïa ka jingkieng ba la shah rong ha ka umsaw ka Wah Ryndi myn ha u snem ba la dep.
