Shillong, K’lyngkot 05
U Working President ka Khun Hynñiewtrep Awakening Movement (KHNAM), Bah Thomas Passah, u la ong ba ka seng kan kren da kaba shai ba kan nym lah satia ban ïatrei kam lang bad ka National Peoples’ Party (NPP) ne wat bad ka Bharatiya Janata Party (BJP) hapoh ka Khasi Hills Autonomous District Council (KHADC) namar ka la ïohi ïa ki rukom treikam jong kine ar tylli ki seng ha kine ki snem bad ki bnai ba la leit.
“Ngin nym lah ban ïatreilang bad ka NPP ne ka BJP hynrei bad kiwei-kiwei ngi lah ban ïatreilang bad kine ki seng kiba ngi la kdew pat, ngin nym lah ban ïatreilang namarba ngi la ïohi ïa ki kam jong ki ba kumno ki treikam”, ong u Bah Thomas.
Ha ka jingïakren bad ki lad pathai khubor ha ka sngi Saitjaiñ ka 4 tarik u Kyllalyngkot, 2025, u Bah Thomas u la ong ba ka seng ka don ïa ki mat treikam kiba shai bha bad ong ba kino-kino ki seng kiba kwah ban ïatreilang bad ka KHNAM hapoh ka KHADC, ki hap ban pdiang ïa baroh ki mat treikam jong ka seng.
“Ngim kwah ban shu pynlut kai ïa ka por lajong hynrei kiwei-kiwei ki seng kiba kwah ban ïatreilang, ki hap ban pdiang ïa baroh ki mat treikam jong ka seng. Na ka liang jong ki, ki lah ban wanrah ïa ki mat treikam da kaba wanrah ïa ka Common Minimum Programme hynrei ki mat jong ngi ki dei ban don beit 100% hapoh ka Common Minimum Programme kaba ngin pyndep ha ki 5 snem ki ban wan”, bynrap u Bah Thomas.
