Jowai, K’lyngkot 06
Haduh palat 13 ngut ki nongtrei tih dewïong la suba ba ki la sahkut shapoh ka krem dewïong kaba don ha Umrangso kaba hapoh Dima Hasao district ka Assam, na ka jingshlei um kynsan.
Katkum ki tyllong khubor la ïathuh ba kane ka jingjia shlei um jong katei ka krem dewïong ka la jia ha ka step jong ka 6 tarik mynta u bnai bad kine ki nongbylla ki la sahkut ha ka krem dewïong No.19 ha 3 Kilo, Umrangso.
Shuh shuh ka tyllong khubor ka la ïathuh ba ki la don haduh 27 ngut ki nongtih dewïong kiba la sahkut shapoh ka krem dewïong No.19 ha 3 Kilo, Umrangso hynrei la ong ba kumba 10 ngut ki la lait phet bad ïoh mih napoh ka krem bad mynta ki don kumba hapdeng 13 haduh 17 ngut kiba dang sahkut shapoh kane ka krem dewïong.
Ka tyllong khubor ka la ïathuh ba ka jingshlei um kynsan jong kane ka krem ka la sdang naduh ka por 7 baje mynstep bad kaba la tuid sha kane ka krem dewïong kaba la pynlong ïa ki nongtih dewïong ba kin sahkut shapoh.
Halor kane ka jingjia, na ka liang ki bor jong ka tnat District Disaster Management Authority (DDMA) kim pat shym la ai ïa kano-kano ka jingpynthikna halor kane, hynrei ki heh ba dei khmih ki la pynpaw ba na ka liang u Deputy Commissioner u la pynlong ka jingleit jurip sha katei ka jaka ban pynthikna ïa kane ka jingjia.
Ki heh ba dei khmih ki la ong, “La pyntip ïa ngi shaphang ki nongtrei kiba sahkut ha katei ka krem dewïong hynrei ïa ka kaiphod ym pat lah ban pynshisha. U Deputy Commissioner jong ngi u dang leit jngoh ïa katei ka jaka, bad lada lah ban pynthikna, yn sa sdang mardor ïa ki kam ban pyllait im ïa ki ba sahkut.”
Ki dur lyngba ki durkhih ki pyni ba kane ka krem dewïong ka duna ki jaka rung kiba biang kaba pynpaw ruh ïa ka jingpulom ha kaba ïadei bad ki lad jingïada.
Ha kawei pat ka liang, ka khubor na ka thaiñ, ki la kynnoh ba katei ka par dewïong ka dei kaba la pyntreikam beaiñ, kata khlem da don ruh ïa ki kyndon na ka bynta ka jingshngaiñ, bad la kynnoh ruh ïa ka jingdonkti lang jong ki ‘riew saiñ pyrthei bad ki bor pulit jong ka thaiñ.
Katba na ka liang ki bahaïing bahasem jong kine ki nongtih dewïong kiba jah rngai ki la pynpaw ïa ka jingsyier ha kaba uwei na ki bahaïing u la ong, “U pyrsa jong nga u dang sahkut hapoh ka krem dewïong. Ngam tip haduh katno ngut kiwei pat kiba la sahkut ha kane ka krem, hynrei nga duwai ban lait na ka jingma.”
Kane ka jingjia ka la pynmih ruh ïa ka jingsngewkhia kaba jur halor ki kam tih dewïong beaiñ bad ka jingbym don ïa ki sienjam kiba shngaiñ hapoh ka thaiñ.
Halor kane ka jingjia, u Myntri Rangbah ka Assam lyngba ka jingthoh ba u la buh ha ka rynsan social media ka X, u la ong ba na ka liang ka Sorkar Jylla ka la kyrpad ïa ka jingïarap jong ki shipai ha ka kam ban pyllait ïa ki briew ba sahkut. Kumjuh ruh na ka liang jong ki briew ka State Disaster Response Force (SDRF) bad ka National Disaster Response Force (NDRF) ki la don ha lynti ban leit sha kane ka jaka ban ai jingïarap.
