Shillong, K’lyngkot 07
Ka Committee kaba la thaw da ka Sorkar Jylla na ka bynta ban khmih bniah ban pynbha ïa ka jingtreikam ka Meghalaya Public Service Commission (MPSC) shen kan sa phah ïa ka kaiphod hapoh jong une u bnai.
U Chief Secretary, Bah DP Wahlang u la ong ba kane ka Committee ka la kynthup shuh sa katto-katne ngut ki ‘riewshemphang ki ban donbynta lang ban pynbha ïa ka jingtreikam ka MPSC bad kan don ruh ka jingpan jingmut na kiwei ruh kiba donbynta.
Kane ka Committee ka don lai ngut ki dkhot na ka bynta ban khmih bniah ban pynbha ïa ka jingtreikam ka MPSC kaba la khlieh da u IAS ophisar, Bah F.R Kharkongor kum u Chairman bad ar ngut ki dkhot, u Bah Cyril VD Diengdoh bad Ambrose Ch Marak kum ki Member Secretary.
Kane ka Committee kan ai jingmut ha kiba bun ki bynta ki ban kham pynjanai ïa ka rukom treikam ka MPSC.
Ka jingthaw ïa ka Committee ka la wan hadien ba la mih ka kynrum-kynram ha ka rukom pynlong eksamin rung kam. Na ka liang ka Committee kan shim ki sienjam ki ban wanrah shisha ka jingpynthymmai ïa ka rukom treikam jong ka MPSC bad ka jingtreikam kaba kaba ai jingshaniah.
Lah ban pynkynmaw ba la mih ki kynrum-kynram hapoh ka MPSC ha kaba ïadei bad ka jingpynlong ïa ka eksamin MCS bad eksamin rung kam Sorkar.
