Shillong, K’lyngkot 08
U President ka Hill State People’s Democratic Party (HSPDP), Bah K.P. Pangniang ha ka Sngi Balang u la ong ba ka seng ka la sei ïa ki kyrtong kiba kynsai tam ban ïa aireng ha kane ka ilekshon ban wan sha ki District Council.
“Watla ngim shym la lah ban pynïeng kyrtong ha baroh ki konstitwensi, hynrei ngi la jied ïa kiba kynsai tam bad ngi ngeit skhem ba kine kiba ngi jied, ka long ba ka seng ka don ka jingkyrmen ban poi sha ka thong,” ong u Bah Pangniang hadien ka jingpynbna ïa ka thup kyrteng kaba ar jong ka seng na bynta ka ilekshon MDC.
Haba ban biang halor ki nongrim jong ka seng, u President u la ong ba ka HSPDP ka dei ka seng kaba la rim tam hapoh ka Jylla (naduh u snem 1968) bad ki mat treikam jong ka ki la don lypa ha ka Riti Synshar jong ka seng bad dei halor kine kijuh ki mat treikam kiba ka seng ka ïeng skhem.
“Kum ban shu pynkynmaw biang ïa ka nongrim ba ka seng ka ïeng – ka long ban pynkhlaiñ shuh-shuh ïa ka bor jong ki District Council hapoh pneh jong ka Khyrnit ba hynriew halor ki lai tylli ki phang pyrkhat jong ka seng kaba ngi ju don – ban pynneh-pynsah ïa ki hok, ki matti jong ki longshuwa, ban ïada ïa ka hok jong ngi, ka khyndew ka shyiap bad u pud u sam bad ban pynbha ïa ka synshar-khadar la ka dei naduh ka synshar shnong, synshar Hima ne District Council,” ong utei u nongïalam.
Ka thup kyrteng kaba ar kaba la pynbna ha kane ka sngi ka kynthup ïa ka kyrteng jong u Bah Starfing Jove Langpen Pdahkasiej na11-Mawsynram, Kong Phinda Warjri na 24-Parïong, bad Bah Srally Rashir na 29-Mawshynrut.
U Bah Pangniang u la ïathuh ruh ba seng shen kan sa pynbna ïa ka thup kyrteng kaba lai bad bakhatduh jong ka namar ka don kawei ka konstitwensi kaba don ïa ka kyrteng jong u MDC ba mynta, Bah Martle N. Mukhim.
“I don ha ka jingshitom bad mynta ka sngi ruh ngim ïoh ban pynkut namar i don ha ka jingshitom bad kumta ha kine ki sngi ngin sa ïoh ïa ka thup kyrteng kaba lai bad kaba khatduh jong ki kyrtong ki ban ïa aireng na ka HSPDP ha kane ka ilekshon MDC ban wan,” u la ong bad ai ruh ka Kitbok-kitrwiang ïa baroh lai ngut ki kyrtong kiba la pynbna ha kane ka sngi.
Ha shuwa, ka HSPDP ka la ïoh ban pyllait ïa ka thup kyrteng banyngkong jong 8 ngut ki kyrtong ki ban ïa aireng sha ka ilekshon Khasi Hills Autonomous District Council (KHADC) bad Jaiñtia Hills Autonomous District Council (JHADC).
Na kitei ki 8 ngut kiba ka seng ka la pynbna, 6 ngut kin aireng sha ka KHADC katba 2 ngut sha ka JHADC.
