Jowai, K’lyngkot 09
U kyrtong ka National People’s Party (NPP) na ka 28-Narpuh Konstitwensi kaba hapoh Jaiñtia Hills Autonomous District Council (JHADC), Bah Daiapherbha Lamare u la pynpaw ïa ka jingthmu bad ka thong kaba shai kdar ban trei na ka bynta ka bha ka miat jong ki paidbah, ban ïada ïa ka hok jong ki, ban pynneh pynsah ïa ka kolshor bad ban kyntiew ïa ka roi ka par lada un ïoh ïa ka jingjop ha kane ka ilekshon MDC ka ban wan.
“Ka thong kaba hakhmat eh ka long ban ïada ïa ka khyndew ka shyiap bad ka kolshor ki briew jong ngi bad ruh ban bteng ban pynim bad pynkhlaiñ ïa ka jingtreikam jong ka Sixth Schedule kaba long ka nongïada ba kongsan halor ki hok bad ka jinglong trai ha ka imlang ka sahlang jong ngi,” ong u Bah Daiapherbha.
U la kular ruh ban pyrshang katba lah ban pynlong aiñ ïa ka Jaiñtia Hills Autonomous (Village and Town Development Council) Bill 2023, bad ban ïoh ïa ka jingmynjur na u Lat ka Jylla Meghalaya. Kane ka sienjam kan pynlah ban pynurlong ïa ka jingbei tyngka kaba beit-beit (direct funding) sha ka District Council bad ka ban ai jingmyntoi beit beit sha ki paidbah bad ki shnong ki thaw.
“Yn pynsuk ïa ka rukom siew khajna da kaba pynrung ïa ka rukom siew digital. Ïa ka khajna kaba heh tam kaba long T.2,500 yn pynkylla bad pynkiew katkum ka jingkylla ha ka jinglong jingman jong ki briew bad ki kam ki jam khnang ban pynthikna ïa ka jinglong khuid suba bad ka jingpynmih khajna kaba kham bha,” u la bynrap.
Da ka jingdon jong khyndai tylli ki karkhana pynmih dewbilat hapoh ka District, ka long kaba kongsan ba ka Jaiñtia Hills Autonomous District Council (JHADC) kan ïoh ïa ka bhah kaba biang na ka khajna. Ka jingnoh synñiang kaba T.1/- shi byrni ka dewbilat kan ai jingmyntoi ïa ka JHADC ka ban ïarap ban pynthikna halor ka jingsiew tulop biang por sha ki nongtrei ka JHADC, bad kane kan pynmih haduh kumba T.6-7 klur shi bnai bad ka ban weng ïa ki jingeh ha ka liang ka pisa tyngka.
Une u kyrtong u la kular ruh halor ki kam pynroi na ka bynta ki nongshong shnong jong ka Narpuh Konstitwensi da kaba noh synñiang ruh 50% na ka tulop jong u na ka bynta ban seng ïa ka Youth Development Centre.
Nalor kata, u la kular ruh halor ki lad jingkyrshan ïa ki paid nongrep namar haduh kumba 70% na ka konstitwensi ki dei kiba im da ka rep ka riang da kaba pyntreikam ïa ki projek bapher bapher ban kyntiew ïa ka rep ka riang bad ïa ka kamai-kajih jong ki nongrep.
Shuh shuh u la kular ruh ba lada un poi sha ka thong un shim ïa ki sienjam ban kyntiew ïa ka kam jngohkai ha ki shnong kiba don ïa ki lad kaba khraw kum ka shnong Sakhri, Lumtongseng, Sonapyrdi, Shymplong, Kuliang bad Borsara. U la ong ba ka jingkyntiew ïa kine ki thaiñ sha ki jaka jngohkai kan ai jingmyntoi shibun ïa ki nongshong shnong ha ka liang ka ïoh ka kot bad kiba bun ki nongshong shnong kin ïoh ïa ki jingmyntoi ha kiba bun rukom.
