Shillong, K’lyngkot 12
Ar ngut ki nongwan jngoh kai pyrthei na Assam ki la mynsaw malu-mala hadien ba ka kali kaba ki la shong ka la kylla ha Mawkdok katba ki dang wanphai na Sohra ha ka Sngi U Blei.
Ha kane ka por, u Myntri Rangbah ka Jylla, Conrad K. Sangma, ka Myntri ka tnad ka koit ka khiah, Dr. M. Ampareen Lyngdoh bad ka kynhun jong ki kaba dang wanphai na Sohra sha Shillong ki la sangeh ha katei ka jaka ban ai jingïarap ïa kitei ar ngut kiba la mynsaw.
U doktor uba la bud lang bad u Myntri Rangbah u la ai dawai-dashin bad khmih ïa kitei kiba la mynsaw katba ki dang ïa ap ïa ka kali kit nongpang ban ïalam ïa kitei ar ngut sha jaka sumar.
Kum ban shu kdew hangne, u Myntri Rangbah u la sah ar sngi ha Sohra ban ïashim bynta ha ka jingïalang jong ka Kynhun Myntri bad ki tnad Sorkar.
