Nongpoh, K’lyngkot 13
Ki nongïalam, ki longkmie lem bad ki paidbah nongshong shnong jong ka Umshangling ha ka Lah Sngi U Blei, ki la leit ban ïakynduh ïa u Deputy Commissioner (DC) ka Ri Bhoi District, u Abhilash Baranwal ban ujor halor ka jingtep torti ïa kawei ka metïap ka bym shym la don kiba wan kam, ïa kaba la tep ha ka jaka tep metïap kaba don mar syndah bad ka jaka bret ñiut jong ka sor Nongpoh ha Umshangling.
Haba kren sha ki lad pathai khubor hadien ka jingïakynduh bad ai jingujor sha u DC, u Rangbah Shnong ka Umshangling, Bah James Maiong, u Secretary Shnong, Bah Vincent Sohkhwai lem bad ka Kong Anjelina Tado, kawei na ki longkmie jong ka shnong, ki la pynpaw ïa ka jingsngewkhia jur halor katei ka jingtep torti ïa ka metïap, ha kaba ki ksew ki la ïoh ban khlong bad patar bad rah ïa ki dkhot met sha ki bynta jong ka shnong ka thaw ha ka Sngi U Blei.
Kitei ki nongïalam shnong, ki la ong ruh ba kane ka jingtep khlem akor ïa katei ka metïap, ka long kum ka jingibeiñ-jingipoh ïa ka shnong ka thaw bad kaba buh jingma ruh khamtam ïa ka koit ka khiah jong baroh ki paidbah nongshong shnong.
Halor kane ka bynta, na ka liang ki nongïalam shnong, ki la dawa na u Deputy Commissioner ka Ri Bhoi District ba u dei ban shimkhia mardor ban pynthikna ba kum kine ki jait jingjia kim dei shuh ban dang jia nangne shakhmat. Ki la dawa ruh ba nangne shakhmat haba wan ban tep ïa ki metïap ki bym shym la don ki bahaïing kiba wan kam ha katei ka jaka, ki dei ban buh da ki briew kiba thikna bad ruh ban pyntip sha ki bor shnong lymda kumta na ka liang ka jong ki, ki lah ban poi shim ïa ka sienjam wat ban ym shah shuh ban leit tep metïap ha katei ka jaka.
Na ka liang jong u Deputy Commissioner u la kular ban shimkhia halor kane ka mat kaba la buh da ka shnong Umshangling kaba ïadei bad katei ka jingtep torti ïa ka metïap bad pyntip ruh shen un sa lum da ka jingïalang ba kyrkieh ïa ki bor ka tnat Pulit, ka Nongpoh Town Committee bad kiwei kiwei kiba don bynta ban pynthikna ba kum kine ki jingjia kiba ktah ïa ka koit ka khiah jong ki paidbah nongshong shnong kin ym jia shuh hadien habud.
