Shillong, Naitung 30
Ki pulit ha ka sngi Palei jong ka taïew, ki la leit dangstep ban ïenglaiñ ha shilynter ka lynti ïaid kjat ha Jail Road, kum shibynta ban khanglad ïa ki nongdie madan ba kin shongdie jingdie biang ha katei ka jaka.
Hadien ba ki pulit ki la ïenglaiñ ha ki jaka ba ju shong ki nongdie madan ha Jail Road, ka la mih ka thma ktien hapdeng ki nongdie madan bad ki ophisar ka tnad Municipal Board, da kaba pyneh ban shongbeit ban die jingdie.
Hynrei na ka liang ki ophisar ka Municipal Board, kim shym la shah satia ïa ki nongdie madan ba kin shongdie jingdie biang namar la bthah ba kin leit shongbeit sha Polo, ka jaka ba ka Sorkar ka la pynshna thymmai.
Lah ban kdew ba ka jaka ba la pynshna ka Sorkar ha Polo, na ka liang kiba die madan kim shym la treh satia bad dawa, ba ka Sorkar kadei ban shna beit ha ki jaka ba long marjan bad ka Jail Road, khnang ba kin lah ban die ïa ki mar jong ki.
Ha kane ka sngi, na ka liang kiba die madan ki la pynpaw ka jingpyrshah, da kaba ki la shongdie jingdie beit, watla ki pulit ki la khang bad ïeng ha ki jaka ba ki ju shong ruh.
Haba ïoh ban ïakren bad ki nongdie madan ki la ong ba ki hap ban sei beit ïa ki tiar jong ki, namar ki mar kin sa pyut.
Ki la ïathuh ba ki pulit naduh dangstep ki la sei bad rah ïa ki lyntang ba ki ju siang ban die jingdie, hynrei ki la ong ba kin die beit ïa ki mar jong ki, da kaba bynrap “Ngin nym ai lad satia bad ngin shongbeit ha kane kajuh ka jaka namar kam shym la pynthud ïa ka ïaid ka ïeng ki paidbah”.
“Ka Sorkar ka mut ban thied ïa ngi da ka pisa bad ngim lah ngeit, ba ka Sorkar ka mut ban ai ïa ngi T.20 hajar marwei, hynrei ngi wan hangne ban kamai hok, ym ban wan dawa ïa kata ka pisa,” ki la ong.
Namarkata, ki nongdie madan ki la dawa beit ba ka Sorkar kadei ban pynkynriah jaka ïa ki ha ki thaiñ Jail Road hi, ym ban pynkynriah ha ki jaka ba jngai bad ki ruh kin pdiang ïa kata.
