Khliehriat, Naitung 30
U Superintendent of Police (SP) ka East Jaiñtia Hills District, u Shailendra Bramaniya u la ong ba ki lah ban don ki riew shim kabu kiba pynmih jingkulmar ha lynti ban leit sha ka jaka pynlong ïa ka public hearing jong ka Shree Cement Ltd. ka ban long lashai ka sngi Thoh-dieng.
Ki pulit ki la pynkhlaiñ bha ïa ki bor pahara ban tehlakam ïa ka jinglong jingman bad pynneh ïa ka jingjai-jai ka thaiñ na ka bynta ka jingpynkhreh ïa kane ka public hearing ka ban long lashai ka sngi ka 31 tarik Naitung ha Lum Syrman, Elaka Narpuh.
Wat hapdeng kane ka jingpynkhlaiñ ki bor pulit ïa ka jingpahara ka la mih ka jingïakynad ha ka thaiñ Elaka Sutnga, ha kaba ki paidbah ba pyrshah ki la khang ïa ki kali ba thmu leit sha ka jaka ba pynlong public hearing kaba la pynlong ïa ki pulit ban tuklar haduh ban da kawang da u tyndong lyer pynsat khmat ne tear gas ban pynpra ïa ki paidbah.
Haba kylli, u SP u la ong ba ki lah ban don ki riew shimkabu kiba pynmih jingkulmar ha kum kane ka por kaba wanlam sha ka jingthut khyndiat ha ka jinglong jingman.
Haba kylli shuh shuh, u la ong ba lada don kum kita ki jingjia, kin ym jia shuh hadien habud, bad ïa kaei kaba la jia un sa bishar bniah bha. U la pyntip ba haduh mynta ka jinglong jingman ka jai-jai bad um pat shym la ïoh jingtip ba ka don ka jingjia ba bom lathi ne bret tear gas ki pulit namar u don ha ka jaka bym don mobile network.
