Shillong, Naitung 30
Ka Hynñiewtrep Youths Development Council (HYDC) ha ka janmiet 29 tarik Naitung 2026 ka la ïoh bat ïa kawei ka kali Mahindra Pickup kaba don ïa u nombor 05 AD 5108 ha Puriang kaba kit masi be-aiñ bad kaba la kit palat pud ïa kaei kaba la buh ki kyndon.
Haba kren u Bah Namarkari Kharlukhi u ba long u Vice President ka HYDC Mawryngkneng Circle u la pynrem ïa kane bad kdew ba namar ka jingjur ka jingkhaïi tuh ïa ki masi ka pynlong ïa ka dor doh masi ha ïew ban kiew dor bad kane ka ktah jur ïa ki briew kiba wan na ki longïing ba duk ba kyrduh namar ba kim lah kotbor shuh ban thied doh masi.
U la pynpaw ba seng ka ju lap ïa ki kali ba kit masi be-aiñ bad pynpaw ka jingpynrem jur ïa kiba donkti bad ka seng ka la dawa ïa ki bor ba dei peit ban pynshitom katkum ki kyndon aiñ ïa kiba donkti.
Nalor kata u la pynpaw ka jinglyngngoh haba ïadei ka jingkiew dor ka doh masi ha ïew kaba la poi haduh T. 600 lane 700 tam shi kilo bad u la kyntu ïa ki bor Sorkar ban shimkhia khnang ba kan ym don jingktah ha ka dor ka mur jong ka doh masi ha ïew.
U la ïathuh ba haba ïadei bad kane ka kali ba la ïoh bat, ka seng ka la ujor FIR ha thanad Mawryngkneng bad dawa ban pynngat kyndon ïa kiba donkti katkum ka aiñ Prevention of Cruelty to Animals Act 1970.
