Shillong, Naitung 30
Ka Shillong Bar Association (SBA) kala pynrem jur ïa ka jingkynnoh jrong kti pyrshah ïa u nongïasaid aiñ bala rim AH Hazarika bad kala rai ban sospon ïa ka jinglong dkhot jong u kat bym pat dep ka jingtohkit.
Ka SBA kala pyrshah jur ruh ïa ka jingkynnoh shoh bad pynïaid bat skhor ïa une u nongïasaid aiñ da ki kynhun.
Ka Executive Committee kaba la pynlong ïa ka jingïalang ba kyrkieh ha ka 29 tarik Naitung, 2026 hadien ba katei ka jingjia kala saphriang ha ki social media ha ka 28 tarik Naitung.
Ka kyrwoh bala phah da u President HR Nath bad Secretary P Jyrwa ka ong ba ka pynrem jur ïa ka kam bala kynnoh bala leh da u AH Hazarika, u nongïasaid aiñ pyrshah ïa ka samla pule ba wan leh intern”.
“Kum kane ka jingleh, lada pynshisha, ka pynkheiñ ïa ka akor treikam, ka burom jong u briew shimet bad ka dei ka bym lah satia ban pdiang,” ong ka Association.
Haba kdew ïa ka jingkhia jong kane ka kam, ka SBA kala rai ban ai ïa ka show-cause notice ïa u Hazarika bad ban leh eiei da kaba tyngeh.
Ka SBA kala pynpaw ruh ïa ka jingsngewkhia ïa ka rukom shah pynïaid kjat u Hazarika ha Shillong hadien ba mih pyrthei kane ka jingkynnoh.
Katkum ka kyrwoh, katto katne ki kynhun kila leit kem, shoh bad pynïaid bat skhor ïa u naduh ka ophis treikam jong u ha Keating Road, Shillong sha thanad Sadar.
“Watla ka long kumno-kumno ruh ne ki jingkynnoh, ym don uwei ruh u briew uba dei hok ban shah leh kum ha kane ka rukom. Kum kane ka kam ka thew sha ka jingshim halade ïa ka aiñ bad ka dei ka bym lah ban pdiang,” ong ka Association haba pynpaw ïa ka jingkyrshan ban pynlong ïa ka jingtohkit ka bym shah liang ha kane ka jingjia.
