Shillong, K’lyngkot 13
U MLA ka Voice of the People Party (VPP) na North-Shillong, Bah Adelbert Nongrum u la thoh sha ka Meghalaya Public Service Commission (MPSC) ban pynbeit thymmai ïa ka tarik pynlong eksamin na bynta ka ‘Junior Divisional Accountant under the Administrative Control of the Director of Accounts and Treasuries Post’ (JDA) ka ban long ha ka 24 tarik u Rymphang, 2025.
U Bah Nongrum ha ka shithi sha u Chairman ka MPSC ha ka Lah Sngi U Blei u la ong ba kum u nongmihkhmat uba don ka jingkitkhlieh, u don ka jingsngewkhia kaba khraw halor ka jingïakynduh jingeh jong ki kyrtong kiba la thep na ka bynta baroh ar tylli ki kam – JDA (Junior Divisional Accountant) bad ka ‘Staff Selection’ ha kaba baroh ar tylli ki eksamin ki hap ha kajuh ka sngi.
Ha kawei ka liang, u la ong ba ki don ki kyrtong kiba la pyndep ïa ka ‘Preliminary Exam’ jong ka ‘Staff Selection’, hynrei ki hap ban leit ïakhun pat ïa ka ‘Main Exam’ ha kajuh ka sngi kaba ïahap bad ka eksamin jong ka JDA ba la pynlong da ka MPSC.
“Kumta nga sngew ba ka ophis jong ka MPSC namarba ka dei ka ‘Autonomous Body’ ka lah ban pyrkhat biang ïa ka rai jong ka ban pynbeit ïa ka tarik ba la kdew khnang ban ym pynduh ïa ka hok jong ki kyrtong kiba angnud wat hapdeng ka jingtbit bad ka jingpynkhreh ïa ka lad ka lynti jong ki kaba lah ban ktah pat ïa ka lawei jong ki bad ka ban wanrah ka jingduhnong kaba khraw na ka bynta ka Jylla baroh kawei,” ong u MLA.
U la ong ruh, “Halor kine kiei-kiei baroh, nga kyrpad jur ïa ka ophis ban pyrkhat biang ha ka ban pynbeit thymmai ïa ka tarik na ka bynta ka jingbit-jingbiang jong kiba bun ngut ki kyrtong kiba don ka jingkyrmen.”
Shuh shuh, u Bah Nongrum u la bynrap ba ka jingpyrkhat bad jingmynjur na ka liang ka MPSC haba ïadei bad kane ka bynta kan kyntiew bad ai mynsiem ïa ki samla bad kan pyni ruh ïa ka jingaiti lut jong ka Commission haba phai sha ka jingbym shah liang bad ka lad ka kabu na ka bynta baroh.
