Jowai, K’lyngkot 14
U Chief Executive Mem-ber (CEM) barim ka Jaiñtia Hills Autonomous District Council (JHADC), Ma Madonbai Rymbai, u la kynthoh ba don katto-katne ngut ki ophisar jong ka JHADC kiba im pahuh-pahai ne ‘Luxu-rious’ kumba ong ha ka ktien nongwei wat hapdeng ka jingbym ïoh tulop da ki phew bnai, katba kiba bun ngut ki ophisar bad nongtrei jong ka JHADC ki im kordit bad sah ram na ka daw ka jingbym ïoh tulop da ki snem.
U Ma Madonbai u la pynmih ïa kane ka jingkynthoh haba kren ha ka jingïalang ba la pynlong ha CTC Orchid Inn Thadlaskeiñ ha ka Sngi Ba-ar ka taïew ban pynithuh ïa ki kyrtong jong ka Congress ban ïakhun ïa ka ilekshon MDC.
U CEM barim jong ka JHADC u la ong ba 5500 tylli ki trok ki ïaid man ka miet ha surokbah National Highway ban kit dewïong ne kit masi ne kit dieng hynrei ka Executive Committee ba la ïalam da ka NPP ha JHADC kam lah ban siew tulop ïa ki nongtrei da ki bun tylli ki bnai.
U la kob ruh ba ha ka por ba long CEM ma u, ki nongtrei JHADC kim ju duh tulop, “Ha ka por ba dang long CEM ma nga ha ki snem 2018-19 tang 2,500 tylli ki trok ki ïaid man ka miet hynrei man u bnai nga lah ban siew tulop ïa ki nongtrei jong ka JHADC”.
U Ma Madonbai u la ong ba ka jingbym ïoh tulop ki nongtrei jong ka JHADC da ki bun tylli ki bnai mynta ka dei na ka daw ka jingpulom jong ka Executive Committee synroplang jong ka NPP bad UDP. U la ong kaba sngewlyngngoh ka long ba kajuh ka seng ka synshar ha Delhi bad Shillong kumjuh ha Jowai hynrei kam shym lah satia ban siew tulop ïa ki nongtrei jong ka JHADC.
U Ma Madonbai uba long kyrtong ka Congress na ka Amwi Khliehtyrshi Konstitwensi, u la ong ba ka Executive Committee kaba mynta jong ka JHADC ka la lilam ïa ka jingpynïaid jong ki Forest Beat House jong ka JHADC sha ki riewshimet bad lada kine ki seng ki neh slem ban synshar khlem pep kin pynkylla shopping mall ïa ka ophis treikam jong ka JHADC.
U la ong ruh ba ka Congress ka la wanrah shibun ki roi ki par ha ka jylla Meghalaya bad ka Congress ka long ka seng kaba long Secular ne ka bym peit niam, bad kumta u la kyntu ïa ki nongtrei jong ka seng ban trei shitom khnang ba kan jop bun ngut na JHADC.
